Әріптестік көкжиегі кеңейе түседі

Кеше Сыртқы істер министрлігінде аталған ведомствоның ресми өкілі Асқар Абдрахмановтың қатысуымен брифинг өткізді. Онда жақын күндерге жоспарланған іс-шаралар мен оқиғалар жөнінде ақпарат берілді. Ресми өкілдің сөзіне қара­ған­да, 14 және 15 қыркүйекте Ук­раи­на Президенті Виктор Яну­ковичтің шақыруымен Қазақстан Прези­денті Нұрсұлтан Назарбаев ресми сапармен бармақ. Қос мем­лекет басшыларының Киевте өте­тін келіссөздері барысында екі­жақты және көпжақты аяда Қазақстан мен Украина ара­сындағы ынтымақтастық мә­селелерін кеңейту жайы көзде­леді екен. Сондай-ақ, екіжақты құжаттарға қол қойылуы тиіс деп күтілуде көрінеді. Бұдан кейінгі кезекте ресми өкіл 15 және 16 қыркүйек күн­де­рі Қазақстан Президенті Нұр­сұлтан Назарбаев Ыстамбұлда өтетін Түркітілдес мемлекеттер басшыларының 10-шы мерей­той­лық саммитіне қатыса­тын­ды­ғын атап өтті. “Алдағы басқосу барысында түркітілдес елдердің көшбасшылары саммитке қа­ты­сушы мемлекеттер арасындағы қа­рым-қатынастарға қатысты бірқатар жағдайларды, ортақ қы­зығушылық туғызатын аймақтық және жаһандық проблемаларды, Түркі кеңесі Хатшылығын құру және басшылығын тағайындау мәселесін талқылайтын болады”, деді бұл турасында А.Абдрах­ма­нов. Тағы бір атап өтерлігі, атал­ған саммит аясында биылғы жыл­дың мамыр айында Түркия Президенті Абдулла Гүлдің Қа­зақстанға ресми сапары бары­сын­да Нұрсұлтан Назарбаевтың бастамасымен Астанада ашылған Түрі әлемі академиясының қызметі жөнінде пікір алмасу болмақ. Сонымен қатар, бұл келелі бас­қо­судың күн тәртібінде Түркі кеңесінің қамқорлығы аясында жаңа консультативті орган – Ақсақалдар кеңесін құру мәселесі көзделіп отырғанын да айтқан жөн. Саммит қорытындысы бой­ын­ша Ыстамбұл декларациясына қол қою жоспарлануда, деді А.Абдрахманов. Бұл күнгі брифингте сондай-ақ, 16 және 17 қыркүйекте Венада ЕҚЫҰ-ға Қазақстанның төрағалығы мен Демократиялық институттар және адам құқық­тары бюросының бірлескен үйлестіруімен Ұйымға қатысушы мемлекеттерде электронды дау­ыс берудің қазіргі ахуалы мен келешегін талқылауға арналған сарапшылар семинары өтетіндігі айтылды. “Ал 16 және 17 қыркүйекте Әскери-саяси өлшемде ЕҚЫҰ мақ­саттарын іске асыру жөнін­де­гі іс-шаралар жоспарына сәйкес, Қазақстанның Қорғаныс ми­нистр­лігі мен Астанадағы ЕҚЫҰ Орталығының бірлесе үйлестіруі­мен Алматыда “Орталық Азия­да­ғы жеңіл және атыс қаруының заңсыз айналымымен күрес” та­қырыбында халықаралық семи­нар өткізіледі. Семинар бары­сында жеңіл және атыс қаруына қатысты импорттау, экспорттау, делдалдық қызмет, таңбалау және бақылаудың халықаралық стандарттары қарастырылады”, деді ресми өкіл өз сөзінде. Брифингте 17 қыркүйекте Мәскеуде өтетін ТМД Экономи­калық кеңесінің 47-ші басқосуы турасында да жан-жақты айтылды. Ләйла ЕДІЛҚЫЗЫ.