Мемлекет басшысының Жарлығымен Білім және ғылым министрі болған Жансейіт Түймебаевтың орнына бұған дейін Әл-Фараби атындағы Қазақ ұлттық университетінің ректоры қызметін атқарып келген Бақытжан Жұмағұлов тағайындалды.
Сәрсенбінің сәтінде Премьер-Министр Кәрім Мәсімов министрліктің ұжымына оның жаңа басшысын таныстырып, Ж.Түймебаевқа жұмысын лайықты атқарғаны үшін алғыс білдірді.
Кездесуде алдымен сөз алған Жансейіт Түймебаев осы қызметте Елбасының сенімінен шығып, берілген тапсырмалар мен жүктелген міндеттерді орындауда барлық күш-жігерін салғанын айтып, Мемлекет басшысына министрлік қызметін сеніп тапсырғаны үшін алғысын жеткізді. Содан кейін Бақытжан Жұмағұлов сөз алып, жаңа жұмыста алдына қойылған мақсаттар мен міндеттерді орындауда Елбасының сенімінен шығуға тырысатынын айтты.
Кездесу соңында Үкімет басшысы жаңа министрге жұмысына сәттілік тілеп, алдағы кезде Білім және ғылым министрлігіне тікелей қатысы бар екі маңызды жиын өтетінін, оның біріншісі мемлекеттік тілді дамытуға арналса, екіншісі, жастар саясатына қатысты болатынын жеткізді.
Дастан КЕНЖАЛИН.