Жоғалған адам табылды. Ауыл әкімдігінің тез арада шешім алып, шұғыл іздестіру жұмысын қолға алуы нәтижесінде қиын жағдайға жол берілмеді.
Шолақаңқаты ауылдық округінде оқыс оқиға орын алды. Яғни, нақтысын айтар болсақ, қаңтар айының 15-і күні кешкілік Аңқаты елді мекенінің тұрғыны, 1956 жылы туған азамат, екінші топтағы мүгедек, жүйкесі ауыратын Валерий Евгеньевич Николаев үйінен шығып кеткеннен қайтып оралмаған.
Бұл хабар ауылдық округтің қызметкерлерінің құлағына кешкілік сағат 18:30 шамасында келіп жетті.
Хабарға әбден қанығып алған Шолақаңқаты ауылдық округінің әкімі Темір Айтқалиев әкімдіктің бас маманы Мақсот Жиенғалиевті құрамаға қосып алып, жоғалған адамды іздестіру жұмыстарына кірісіп кетті.
Айта кету керек, әкімдіктің бас маманы Мақсот Жиенғалиевтің бұл іздестіру жұмысына жоғалған адам В.Николаевтың зайыбы Вера Ивановна мен ауыл тұрғыны Татьяна Вологинаны қосып алғандығы әбден жөн болған сыңайлы. Өйткені, сенбінің ертеңгілік іздестіру кезінде жоғалған адамның зайыбы Вера Ивановна күйеуінің аяқ киімінің іздерін танып, түсіп қалған қолғабының да күйеуіне тиесілі екендігін дәлелдеп, бұл жұмыс түйінінің шешілуіне де көп көмегін тигізе білді.
Сөйтіп, жүйке ауруына шалдыққан ауыл тұрғыны В.Николаев 16 қаңтар күні түс кезінде Шолақаңқаты өзені бойынан, ауылдан 6 шақырым жерден аман-есен табылды.
Жүйке ауруына әбден шырмалған мүгедек жанды ауылға, отбасына жеткізуде ауыл тұрғыны Асқар Хасанов та өзінің қарда жүретін моторлы шанасымен тез келіп, көмек қолын соза білді.
Мүсірбек Айташев.
Батыс Қазақстан облысы,
Сырым ауданы.