Дамаскіде жарылыстан 70 адам қаза тапты
Рейтер агенттігінің жергілікті тұрғындардың сөзіне сүйеніп хабарлауынша, өткен жексенбіде Дамаскіде күшті жарылыс жасалып, осы тағылық әрекет салдарынан 70 адам қаза тапқан. Ал АҒР ақпарат агенттігінің мәлімдеуінше, жарылыстан зардап шеккендердің саны 120 адамға жетіп жығылады Бұл жарылыс шииттер қалың орналасқан ауданда жасалған. Басында автокөлікке қойылған бомба жарылған. Мұнан кейін осы оқиға болып өткен орынға таяу жерден тағы бір лаңкес өзін өзі жарып жіберген. Бұл оқиғаның жауапкершілігін, алдын ала мәліметтер бойынша, «Ислам мемлекеті» делінетін лаңкестік тобыр өз мойнына алған. Интернетте таратылған мәлімдемелерде ИМ мүшелері шииттерге қарсы тағы да осындай лаңкестік әрекет ұйымдастырылатындығын ескерткен. Осы оқиғаға байланысты құқық қорғау органдарының таратқан ақпараттары бойынша қаза тапқандардың ішінде 25 адам Сирия президенті Башар Асадтың режімін қолдаушы қарулы топ мүшелері болып шыққан.Мексикадағы мейрамда 11 адам өлтірілді
Мексиканың Герреро штатындағы Койука муниципалитетінде «15 жасқа толғандардың мейрамы» деп аталатын мереке кезінде 11 адам қаза тапқан. Бұл мереке өткен жексенбі күні болып өткен. Штат губернаторы Эктор Астудильо Флорестің мәлімдеуінше, бұл мейрам Мексикада кең қанат жайып отыр. Оны негізінде 15 жасқа толған қыздар үшін ұйымдастырады. Бұл мерекеге әдетте жүздеген адам жиналады. Міне, осы мереке тұсында бандиттер тұрғындарға шабуыл жасап, осының салдарынан адамдар қайтыс болған. Осы оқиға жайында жергілікті полиция өкілдері хабар алысымен оқиға орнына жетеді. Оларға бандиттер оқ атқан. Әзірге құқық қорғау органдарының қызметкерлері арасынан қаза табушылар туралы деректер жоқ. Дегенмен, Койуки ауданында Мехикодан машинамен келе жатқан тағы да екі жас жұптың қайтыс болғандықтары туралы хабарлар таратылды. Герреро штаты прокуратурасының таратқан хабарынша, оларды да бандиттер өлтіруі әбден мүмкін. Қазіргі күні оқиға болған жерге полиция мен әскер күштері жеткізілді. Жергілікті билік болып өткен оқиғаның себеп-салдарын зерттеуге кірісті. Алдын ала мәліметтерге қарағанда, бұл өңірде бір-біріне қарсы тұрған қылмыстық топтар белсенді әрекет етіп келген. Олар осы өңір арқылы өтетін есірткі саудасын өз қолына алғылары келетін көрінеді. Осыған қарағанда, бейбіт тұрғындар бандиттер арасындағы атыс салдарынан қаза табуы әбден мүмкін.«Боко Харам» жасағының жантүршігерлік әрекеті
«Боко Харам» ислам тобының өз бетімен қаруланған жасағы Нигерияның солтүстік-шығысында орналасқан Далори деревнясына шабуыл жасаған. Шабуыл салдарынан ондаған адам қаза тапқан. Соңғы мәліметтерге қарағанда, қаза тапқан адамдардың саны 80-ге дейін жетіп отыр. Оқиға куәгерлерінің мәлімдеуінше, шабуыл жасаған жасақ тұрғын үйлерді өртеген. Осының салдарынан ондаған адам тірідей өртеніп кеткен. Куәгерлер өртке оранған үйлерден адамдар мен балалардың шыңғырған дауысын естіген. Енді бір куәгерлер көшелерде өртенген адамдардың мәйіті жатқандығын мәлімдеген. Деревняда өрттен аман қалған үй жоқ көрінеді. Өткен жылдың желтоқсан айының соңында Нигерия президенті Мохаммад Бухари «Би-би-си» телеарнасына берген сұхбатында өз елінің қарулы лаңкестермен қақтығыста техникалық тұрғыда жеңіске жеткендігін мәлімдеген болатын. Олар «Боко Харам» лаңкестерімен болған қақтығыста үнемі жеңіске жетіп, бірнеше жүз тұтқынды босатқандығы жөнінде айтылған еді. Ал Далори деревнясында болған бұл қанды оқиға лаңкес қарақшылардың өз әрекеттерінен әлі де бас тартпағандығын көрсетіп отыр.Израиль солдаттары шабуылға ұшырады
Иордан өзенінің батыс жағалауында Израиль солдаттарына күтпеген шабуыл жасалды. Осының салдарынан 3 солдат жарақат алған. Ал шабуыл жасаушы атыс кезінде қаза тапқан. Шабуыл жасаушы Рамаллаға таяу орналасқан «Фокус» шекара бекетіне автокөлікпен келіп, одан шыға салысымен солдаттарға қарай оқ жаудырған. Осы оқиға салдарынан 2 әскери ауыр жарақат алған. Бір жауынгер жеңіл жараланған. Бекетте тұрған басқа солдаттар лаңкеске қарсы оқ атып, оны өлтірген. Осы оқиға жайында хабар таратқан бұқаралық ақпарат құралдарының мәлімдеуінше, Иордан өзенінің батыс жағалауы мен шығыс Иерусалимде жүзден астам елді мекенде 500 мыңға жуық израильдіктер өмір сүреді. Халықаралық қоғамдастық бұл аумақты Израиль мемлекеті арабтардан басып алған жер деп таниды. Ал Израиль тарабы болса, мұны мойындағысы келмейді. Олар мұнда өз азаматтарының заңды түрде өмір сүріп жатқандығын айтады. Таласқа түсіп отырған аумақта кикілжің оқиғалардың жиі кездесетіндігі, кейде оның соңы атыс-шабысқа ұласып кететіндігі белгілі. Жоғарыда болған оқиғаға да осындай жағдай түрткі болуы әбден мүмкін. Қазіргі күні БҰҰ мен АҚШ палестиналық аумақтардың есебінен еврей елді мекендерінің кеңеюіне қарсы шығып отыр. Өйткені, бұл үдеріс Израиль мен Палестинаның арасындағы бейбіт келіссөздердің жүруіне үлкен бөгет болуда.Өндірісін алты күнге тоқтатады
Аса ірі жапон автоконцерні Toyota Motor («Тойота») үстіміздегі жылдың 8 ақпанынан бастап Жапониядағы өзінің 9 кәсіпорнында өндірістік үдерістерді 6 күнге тоқтатады. Бұл жайында кеше компанияның баспасөз қызметі мәлім етті. Тойота компаниясының мұндай қадамға баруына Айти префектурасындағы болат өндіретін зауытта болған жарылыс әсер еткен. Осыған байланысты Тойота өндірісінде уақытша болат жетіспеушілігі пайда болып отыр. «Айти стил» компаниясы зауытындағы жарылыс 8 қаңтар күні болған. Жарылыс кезінде ешкім зардап шеккен жоқ. Бірақ өндірістік желілердің бірі қатты зақымданған. Оның жөндеу жұмыстары наурыз айында аяқталмақ. Осы оқиғаға байланысты басқа өндірістік желілерде жұмыс көлемі арттырылғанымен, сондай-ақ, басқа да болат өндірушілер зауыттардан қосымша жеткізілімдер ұйымдастырғанымен, Тойотаның жұмыс ағымында елеулі кедергілер пайда болған. Тойота компаниясының Жапонияда автокөліктермен оларға қажетті қосалқы бөлшектер шығаратын 16 кәсіпорыны бар. Әр жыл сайын елде конвейерден 13-14 мың атаулы маркадағы машиналар шығарылады. 2015 жылдың қорытындысында Тойота сатылған автокөліктерінің көлемі жағынан тағы да әлемдік көшбасшы компания екендігін дәлелдеді. Компаниядан таратылған мәлімет бойынша, өткен жылы 10,15 миллион автокөлік сатылған. Ал 2016 жылы Тойота бүкіл әлем бойынша 10,2 миллион машина шығаруды жоспарлап отыр. Бұл автокөліктердің 4 миллионға жуығы Жапонияның өзінде шығарылатын болады.Кубаға табиғат құбылысынан келетін зардап сұрапыл болғалы тұр
Кубада өткен жылдың қараша айында басталған Эль Ниньо деп аталатын табиғат құбылысы елге үлкен құрғақшылық әкеледі деген қауіп бар. Басында күшті жаңбыр жауған. Бұл құбылыс бұл елде 1982-1983 жылдары және 1997-1998 жылдары болып өткен. Осы оқиғаға байланысты Кубаның ауыл шаруашылығы үлкен зардап шегеді деген пікірлер бар. Өйткені, осы құбылыс салдарынан қант құрағы, темекі, күріш, кофе және көкөніс өсетін егістіктер үлкен бүлінушілікке ұрынған. Қазіргі есептеулер бойынша осының салдарынан елдің ауыл шаруашылығы сан миллион песо тұратын шығынға тап келген. Бұл елдегі ауыл шаруашылығы саласы өткен 2015 жылы егістіктегі ылғалдың жетіспеушілігі салдарынан 90 мың тонна күрішті жылдағыдан кем алған болатын. Басқа да егіс түрлерінде де осындай шығындар болды. Енді «жұт жеті ағайынды» дегендей, бұл табиғат құбылысы қараша айынан бастап тіпті үдей түскен. Қазіргі болжамдар бойынша елдің ауыл шаруашылығы саласы өзінің қалыпты жағдайына жуық маңда түсе қоймайды. Мұның салдары биылғы жылдың көктемі мен жазында білінетін болады. Мамандардың айтуынша, алдағы жазда елді үлкен құрғақшылық күтіп тұр. Топтаманы дайындаған Сұңғат ӘЛІПБАЙ, «Егемен Қазақстан».