Қазақстанда тағы бір үлкен саяси науқан басталды. Мәжілістегі 107 орын үшін саяси партиялар бәсекені бастап кетті. Ал жергілікті мәслихаттарға үміткерлер тіркеліп жатыр.
Қызылорда облысындағы доданы ең бірінші болып «Қызылорда тазалық» ЖШС-нің директоры Талғат Құлмағанбетов бастады. Ол кеше №12 «Орталық» сайлау округінен қалалық мәслихатқа үміткер ретінде тіркелді. Үміткерді тіркеу рәсімі бірнеше минутқа ғана созылды. Сайлау округіндегі жұмыстың жүйелі әрі өз заңдылықтарын сақтап жұмыс істеп жатқанын осыдан-ақ көруге болады. Мұнан соң мәслихат депутаттығына кандидат журналистермен сұхбаттасты.
– Соңғы жылдары Қызылорда облысы қарқынды даму жолына түсті. Әлеуметтік-экономикалық даму көрсеткіші бойынша еліміздің маңдайалды аймақтарының біріне айналды. Соның ішінде өзім басшылық етіп отырған «Қызылорда тазалық» мекемесінің де біраз жетістіктерге жеткенін айтқан абзал. Атап айтар болсақ, мекемені заманауи технологиялық құрал-жабдықтармен толықтырдық. Осының арқасында қаладағы жаяу жүргіншілер жолын, саябақтар мен көшелерді таза ұстайтын жағдайға жеттік. Ал бұрын мұндай жұмыстардың барлығын адамдар қолмен атқаратын еді,– дейді ол.
Үміткер аймақтың экологиялық ахуалына баса назар аударатынын айтады. Қызылорда қаласын көркейту, көгалдандыру, жасыл желекке айналдыру бағытында арнайы бағдарлама да түзген. Сонымен қатар, Елбасы «Нұр Отан» партиясының XVII съездінде партияның сайлауалды бағдарламасын айқындап бергенін, сол бойынша ауқымды жұмыс атқаруға бел шеше кірісетінін мәлім етті. Оның ішінде халықты әлеуметтік жағынан қамсыздандыру мәселесін негізгі бағыттарының бірі ретінде қарастырып отыр. Халықтың қолдауына ие болып, мәслихат депутаты болып сайланған жағдайда әлеуметтік мәселелердің орындалуы мен мемлекет тарапынан жұртқа жасалып жатқан көмектің өз дәрежесінде жетуін назарда ұстамақ. Әсіресе, аз қамтылған отбасылар мен Ұлы Отан соғысының ардагерлеріне жасалатын қамқорлықты көбейтуге күш салмақ.
Қалалық мәслихаттың депутаты болуға тағы бір үміткер тіркелді. Ол – «Ақиқат нұры» қоғамдық бірлестігінің төрағасы Маратбек Нұржанов. Үміткер №14 «Шұғыла» сайлау округінен саяси додаға түспек. Маратбек Нұржанов сайлауалды бағдарламасында ұлттық құндылықтардың сақталуы, мәдени мұрамыздың насихатталуы секілді, тағы да басқа мәселелерді қамтығанын айтады.
Ержан БАЙТІЛЕС,
«Егемен Қазақстан».
ҚЫЗЫЛОРДА.