Кеше Астанадағы Ұлттық академиялық кітапханада Тәуелсіздіктің 25 жылдығына арналған осы тақырыптағы кітап көрмесі және «Ақындар Тәуелсіздікті жырлайды» атты поэзиялық марафон өтті.
Аталмыш көрменің негізгі мақсаты – Қазақстанның қазыналы тарихын, 25 жыл ішіндегі экономика, саясат және әлеуметтік саладағы жетістіктерін, әлемдік қауымдастыққа танылған мемлекетіміздің қарышты, қарқынды даму кезеңдерін баяндау. Көрмеде бес институттық реформаны жүзеге асыру бойынша «100 нақты қадам» – Ұлт Жоспарын және 2015 жылғы 30 қарашадағы Елбасы Н.Ә.Назарбаевтың Қазақстан халқына арнаған «Қазақстан жаңа жаһандық нақты ахуалда: өсім, реформалар, даму» атты Жолдауын түсіндіруге баса назар аударылған. Қазақ мемлекетінің сан ғасырлық даму тарихындағы уақыт пен ұрпақтар сабақтастығын көрсету, сондай-ақ, жастардың патриоттық сезімін оятып, оң имиджін қалыптастыру шарапатты шараның негізгі міндеті ретінде айшықталған.
Көрмеден бөлек, жырдан шашу шашқан ақындардың поэзиялық кеші де өткен тарихымыздың өшпес тұстарын баяндауға бағытталды. Бодандықтан бостандыққа дейінгі ғұмырымызды әр ақын әлінше жырлады. Ақын, халықаралық «Алаш» сыйлығының иегері Серік Тұрғынбеков тәуелсіздік дейтін тәтті ұғымының мәні мен маңызын терең тебіреніспен қозғап, тыңдарманның ойын тарих көшіне ілестіріп әкеткендей күйге бөледі. Одан соң бүгінгі жастар поэзиясының жалынды өкілдері Ербол Бейілхан, Олжас Қасым, Ербол Алшынбай өлеңдерін өрлетті. Айтулы кештің тізгінін айтыскер ақын, «Дарын» мемлекеттік жастар сыйлығының лауреаты Дәулеткерей Кәп ұстап, әдебиет әлеміндегі ойлы оқиғаларды ортаға салды.
Рауан ҚАЙДАР,
«Егемен Қазақстан».