Әлемдегі ең танымал футболшылардың бірі Неймардың басына қара бұлт үйірілді. Атап айтқанда, спортшы тапқан табысының салығын уақытында төлемесе керек. Соған орай, Бразилияның Сан-Паулу федералды соты оның иелігіндегі активтердің айналымына тыйым салу туралы шешім шығарды. Қатарында ұшақ, яхта, жылжымайтын мүлік сынды құнды дүниелер бар бұл активтердің жалпы сомасы 50 млн. АҚШ долларына жетіп жығылады.
Өткен жылы Бразилия соты футболшының өзін, отбасын және оларға тиесілі компанияны салық төлеуден жалтарғандары үшін айыптаған болатын. Тағылған айып бойынша, Неймар «Сантос» клубы сапында ойнаған 2011-2013 жылдар аралығында мемлекетке 16 млн. доллар салық төлемеген.
Алайда, футболшының өзі бұл айыпты негізсіз деп санайды. Тіпті, ол айыптаушыларға қарсы шағымданып, федералды сотқа апелляция да берген. Дегенмен, сот оның шағымын қанағаттандырмады. Дәл осы шешім Неймардың активтеріне тыйым салуға негіз болып отыр.
Бразилия ұлттық құрамасы мен Испанияның «Барселона» командасының ойыншысына қарсы қозғалған іс тек бұл емес. Бүгінде өзінің туған елінен бөлек, Испанияда да Неймарға қатысты іске тергеу жұмыстары жүргізілуде. Нақты айтар болсақ, «Барселона» ойыншы үшін «Сантосқа» 57,1 млн. еуро төлеген. Бұл қаражаттың басым бөлігін футболшының әкесіне тиесілі Neymar Santos компаниясы алған. Ал тергеу барысында Испания клубының Неймардың трансфері үшін 83,3 млн. еуро жұмсағаны анықталып отыр.
Ернар МҰХАМБЕТ.