АСТАНА. 11 наурыз. Мексикада табиғаттың тосын мінезінен тұрғын үйлер жарықсыз қалды. Бұл туралы 24.kz-ке сілтеме жасаған egemen.kz тілшісі хабарлады.
Телеарнаның хабарлауынша, Мексикадағы ұйытқып соққан дауыл мен толассыз жауған қар аралас жаңбыр салдарынан бір адам қаза тауып, 16 тұрғын дене жарақатын алған. Сондай-ақ, электр желілері үзіліп, 3,5 миллион тұрғын үй жарықсыз қалған.
Жергілікті ұлттық азаматтық қорғаныс күштерінің дерегіне сүйенсек, сағатына 70 шақырым жылдамдықпен соққан дүлей дауыл 1700 үйді қиратқан. Сонымен қатар, мыңға жуық талды тамырымен жұлып, жүздеген жарнама тақталарын құлатып кеткен. Елдің астанасы мен өзге де бірнеше штаттарда мектеп жұмысы уақытша тоқтатылды.
Айта кетейік, Мексикада зардап шеккен аудандарға көмек беру үшін 2 мың техника мен 7,5 мыңға жуық адам жұмылдырылған.
Талғат Райымбек.
Дерек, сурет: 24.kz.