қарағай мен қайың көшеттерінен құралды
Шығыс Қазақстанда орманшылар облыс орталығының маңайына жасанды орман өсіруде. Осы мақсатта өңірдегі арнайы тәлімбақтарға қатаң ауа райына бейімделген екі жарым мың қарағай мен қайың көшеттері отырғызылды.
Жуырда осы қолдан егілген көшеттері өскемендіктердің жақсы көретін демалыс орындарының бірі – Таулы Үлбі аумағындағы 50 гектар аумаққа қоныстандырылды. Жас өскіндердің жайқалып өсуі үшін аталған аумақ долы дауыл құлатқан және кәрілік жетіп, қураған ағаштардан тазартылды. Жасанды орманның арасында жолаушыларға арналған жолдар мен демалушылар еркін сейілдеуі үшін аллеялар да ескерілді. Ағаштардың діңі қатайып, жасыл желек жамылған кезінде бұл орындарға тынығушыларға арналған сәкілер мен шатырлар орнату көзделіп отыр.
– Балаларымыз, немерелеріміз, келешек ұрпақ орманның рахатын көруі тиіс. Орман – біздің байлығымыз. Ол неғұрлым көп болса, байлығымыз да көп болады, – дейді орманшы Мұрат Оразғалиев.
Думан АНАШ,
«Егемен Қазақстан»
Шығыс Қазақстан облысы