Семейдің әкімін де іске қосты
Шығыс Қазақстан облысына қарасты Семей шаһарында жылуды пайдаланғаны үшін төлемақы төлемегендермен күрестің тың жолы табылды. Қала әкімі Ермек Сәлімов қолы қалт еткенде борышкерлерге хабарласып, берешекті тезірек қайтаруды өзі өтінетін болыпты. Ал осы демалыс күндері қала басшысы қоңырау шалған 15 тұрғынның арасында қарызы 200 мың теңгеге дейін жеткендер бар.
Бүгінде қаладағы жылуға қарыздың жалпы көлемі – 600 миллион теңгеге жуық. Бұл көрсеткіш жақын арада төмендеуі тиіс. Әкім хабарласқан семейліктердің басым бөлігі қарызды 9 мамыр – Жеңіс күніне дейін төлеуге уәде беріп отыр.
– Кей тұрғындар әкімнің қоңырау соққанына таңдана қараса, кейбір жандарға бәрібір, ал келесі біреулері қарыз екендіктерін мойындаса да төлемейтіндіктерін айтады. Ал біз қарызды тезірек жинауымыз керек. Уақыт тығыз болғандықтан, бұл жұмысқа мен де кірістім, – дейді қала әкімі Ермек Сәлімов.
Думан АНАШ,
«Егемен Қазақстан»
СЕМЕЙ