Өскемен әуежайы мерекедегідей безендірілген. Аспаннан ақша қар қылаулап, адам жанын шаттыққа тербегендей. Онсыз да жиналған мыңдаған өскемендіктер Павлодардан келетін ұшақты асыға күтіп, аспанға телміреді. Ақыры ұшақ 24-ші қаңтарда кешкі 21.00-ге таман Өскеменге келіп қонды.
Музыка әуені қалықтайды. Сәлден кейін траптан түскен VII Қысқы Азия ойындары алау эстафетасы дирекциясы жетекшісінің орынбасары Сәрсен Құранбек бастаған делегацияны облыс әкімі Бердібек Сапарбаев, Қазақстанның халық жазушысы, жасы 90-ға таяп қалса да бауыр басқан Алматысында жата алмай, Алтайға келген, қасиетті алауды өз қолымен ұстауды армандаған Әзілхан Нұршайықов, Қазақстанның халық әртісі Роза Рымбаева мен басқа да әнші, ақын-жазушылар, қаланың ардагерлері мен оқушылары, студенттері қарсы алды.
Келесі күні Бердібек Мәшбекұлы Азиада алауын атақты хоккейші, Наганода өткен Қысқы Олимпия ойындарында еліміздің құрама командасының капитаны болған Ерлан Сағымбаевқа ұсынды. Ерлан Ерлесұлы екі жүз метр жүгірген соң Ерлан Қайырбаевқа ұсынды. Ал Айдар өз кезегінде алаулаған алауды шырайлы шығыста мыңдаған белгілі спортшыларды баулып өсірген Шығыс Қазақстан Мемлекеттік университетінің ректоры, профессор Бейбіт Мамыраевқа ұсынды. Атап өту керек, осы жоғары оқу орнын аяқтаған 20-дан астам қысқы спорт шеберлері ел намысын қорғағалы отыр.
Бұдан кейін актер Досқан Жолжақсынов, ақын-жазушылар Ұлықбек Есдәулет, Дидахмет Әшімхан, Сәдібек Түгел, әнші Тоқтар Серік те өздеріне тиесілі 200 метрді жүгіріп өтті. Атақты дзюдошы, Әлем кубогының иегері, екі Олимпия ойындарына қатысқан Руслан Сейілханов, астаналық журналист Берік Уәли, түйе балуан Мұсылманбек Қажымұқанов, ардагер спортшы, Әлем чемпионы Қали Иманбаев, суретші Еркін Нұразхан үшін де алау ұстаған сәт мәңгі есте қалары сөзсіз.
Кикбокстан әлемнің бес дүркін чемпионы, облыстық спорт және дене шынықтыру басқармасының бастығы Асқар Можанов жазушы Әзілхан Нұршайықовпен бірге Республика алаңындағы биік мінбеге көтерілген кезде қалың жұрт ду ете қалды. Әзағаң Асқар екеуі Орталық алаңдағы алауды жақты. Түстен кейін эстафетаның екінші кезеңі басталып, алауды бірінші болып Роза Рымбаева алып жүгірді. Әр аудандардан келген Н. Шаухин, велосипедші Т. Қасымов, Ә. Досқажанов, С. Картоев, боксшы Д. Сужанов, белгілі кәсіпкер, спорт меценаты, ауған соғысының ардагері Қайрат Мусин, т.б. алаумен бірге жүгірді. Атап өту керек, алаумен жүгіру кезінде сәйгүлік атқа мінген белгілі спортшылар жерлестерін қолдап отырды, тіпті су үстімен де алауды алып өтті. Соңынан желаяқ қызымыз Ольга Рыпакова алауды тұтатты.
Оңдасын ЕЛУБАЙ, Өскемен.