Ресейге экспортқа шығарылады
Қазақстан кәсіпкерлері шілде айынан бастап Ресейдің Омбы қаласында азық-түлік жәрмеңкесін өткізіп тұратын болды. Бұл мәселе Қазақстан кәсіпкерлері делегациясының осы облысқа жасаған іскерлік сапары барысында шешілді.
Республика Ауыл шаруашылығы министрінің орынбасары Ерлан Нысанбаев сапар барысында облыс губернаторы Виктор Назаровқа бірлесіп өткізетін бөлшек сауда жәрмеңкесінің кестесін жасауды өтінді. Онда Омбы облысының үкіметіне Қазақстан өнімдеріне арналған жәрмеңкені шілденің соңында өткізу ұсынылды. Кәсіпкерлер бизнес-миссия барысында сондай-ақ Қазақстанға Омбыдан ресторан және кондитер жабдықтарын, ал Қазақстаннан Омбы облысы мен Ресейдің басқа да аймақтарына қымыз жеткізу жөніндегі екі келісімшартқа қол қойды. Іскерлік сапары барысында Қазақстанның ауыл шаруашылығы, тамақ, құрылыс, химия және қаттамалы заттар кешені саласындағы 20 өндірісшісі өздерінің өндірістік мүмкіндіктерін көрсету мүмкіндігіне ие болды.
Кездесу кезінде Нысанбаев екі жақтың да өзара сауда-экономикалық қарым-қатынасты тереңдетіп, бизнесті дамытуға, соның ішінде ауыл шаруашылығына басыңқылық беруге мүдделі болып отырғандарын атап өтті.
«Қазақстан ірі аграрлы ел болып табылады. Мұнда сала толық нарықтық басқару моделіне көшірілген, осының арқасында инвесторлар үшін өте тартымды да тиімді болып отыр. Егер жақсы бастамалар болып жатса, біз оны Еуразиялық экономикалық одақ шеңберіндегі интеграция процесі аясында жеделдетуге тиіспіз. Сондықтан, осындай әртүрлі пішімдегі кездесулер, үнқатысу алаңдары қажет», – деді Қазақстан делегациясының басшысы.
Сапар барысында өзара ынтымақтастықтың басыңқы бағыты ретінде жәрмеңкелер алмасып тұру екені айтылды. Өз кезегінде Назаров жаңа бірлескен кәсіпорындар ашып, сауда қарым-қатынастарын дамытуға мүдделі екендіктерін атап өтті.
«Біздің облысымыз екі елдің ірі көлік дәлізінде орналасқан. Сол себепті де өзара сауда ұйымдастыру үшін шекара аймағында біртұтас логистикалық орталық ашу жөніндегі жоба бізге маңызды да болашағы зор бағыт болып көрінеді. Омбы облысының транзиттік әлеуетін жүзеге асыру – біздің басыңқы бағыттарымыздың бірі», – деді облыс губернаторы.
Қазақстан делегациясы бұдан басқа Омбы облысының бірқатар кәсіпорындарын аралап көрді. Ол сондай-ақ қазақ тілі мен мәдениеті орталығының жұмысымен танысып, Қазақстанның Омбыдағы консульдігінде қазақ қауымымен кездесті.
Руслан ИГІЛІК