Nissan көліктерінің шығарылуына тыйым салынады

АСТАНА. 16 мамыр. Оңтүстік Корея билігі Nissan Motor автоөнеркәсібіне жіберген кемшіліктері үшін 300 миллион вон (280 мың доллар) көлемінде айыппұл салып, Qashqai үлгісіндегі көліктердің шығарылуына тыйым салмақ. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. «Біз Nissan компаниясына қоршаған ортаға тарайтын қалдықтарды азайтып көрсететін құрылғы орнатқаны үшін осындай көлемде айыппұл салуды жоспарлап отырмыз. Ал Qashqai көліктерінің шығарылуы тоқтатылады. Сонымен қатар, өткен жылдың қараша айынан бері шыққан автомашиналар кері қайтарылады», ­­­– деді Оңтүстік Кореяның қоршаған ортаны қорғау министрлігі. Аталған министрліктің мәлімдеуінше, автоконцерннің президентіне қатысты қылмыстық іс қозғалуы мүмкін. Билік жапониялық автоконцернге ақаулы көліктерді жөндеуден өткізуге 45 күн уақыт берді. Айта кетейік, 2015 жылы дәл осындай мәселеге Volkswagen автоконцерні де тап болған. Компания басшылығына Еуропаның, Азияның бірқатар елдері ірі көлемде айыппұл салып, компанияны сотқа берді. Мәліметтер бойынша, әлемде 11 миллионға жуық көлікте қоршаған ортаға тарайтын қалдықтар көрсеткішін азайтып көрсететін құрылғы орнатылғаны анықталды. Ал осы олқылықтың орнын толтыру үшін Volkswagen жалпы көлемі 16,2 миллиард долларға шығындалды. Аян Әбдуәли. Дерек, фото: ТАСС.