Тәжікстанға тағы да көмек

Қазақстан Республикасы Үкіметінің 2015 жылы табиғи апаттан зардап шеккен Тәжікстан Республикасының тұрғындарына ресми гуманитарлық көмек көрсету туралы шешіміне сәйкес, Қазақстан тарапы 18 вагон гуманитарлық көмек жіберді, вагондар біртіндеп Душанбе қаласына келе бастады. 12 мамырда гуманитарлық көмекті ресми түрде  беру рәсіміне Қазақстанның Тәжікстандағы елшісі Нұрлан Сейтімов пен Тәжікстан Республикасы Үкіметінің жанындағы Мемлекеттік материалдық резервтер агенттігі директорының орынбасары Сохибджон Зиедуллоев қатысты. Құны 873 мың АҚШ долл. құрайтын бидай ұнын, макарон өнімдерін, ет және сүт қалбырларын, кептірілген көкөністерді, өсімдік майын, сары май мен шәй жіберілді. Тәжікстан Республикасы Үкіметінің өтінішіне Қазақстан 2015 жылы 4,7 млн. АҚШ доллары көлемінде көмек көрсетті,  бұл Тәжікстанның өткен жылы қабылдап алған гуманитарлық көмегінің жалпы көлемінің 9,5%-ын құрады. «Егемен-ақпарат»