Қазақстандық қару-жарақ

көрмесіне 100-ден аса отандық компания қатысады KADEX көрмесі Қорғаныс минис­трлі­гінің ұйымдастыруымен 2010 жылдан бері өткізіліп келеді. Алғашқы кезде аталған шараға 156 компания қатысқан. Сол жылы көрме негізінде 1,5 млрд. АҚШ доллары сомасында 10 ұзақ мерзімді құжатқа қол қойылды. Қазақстаннан 86 кәсіпорын өз өнімдерін ұсынып, шетелдік әріптестерімен келісімшарттар жасасқан болатын. Қазіргі кезде Астана халық­аралық әуежайының әскери секторында «KADEX-2016» ха­лық­аралық көрмесіне қызу дайын­дық жұмыстары жүргізілуде. Павиль­ондардың құрылысы салынып жатыр. Жақын арада әскери техникалар әкелінеді. Қолда бар мәліметтерге қарағанда, осы техникалардың біраз бөлігін Ресей Федерациясы ұсынады. Бұл ел жоғары технологиялық танкіге қарсы зымыран кешендері мен шабуылдау қару-жарақтарын көрсетеді. Ресейде қару-жарақ пен оқ-дәрілерді жасауда «КБП» АҚ зауытының 85 жылдық тәжі­рибесі бар. Ал «Вологда оп­ти­ка-механикалық зауыты» АҚ компаниясы броньды танкті тех­ни­каға арналған жүйелерді (Т-90, Т-80У, БМП-3, БТР-80, МТ-ЛБМ) жеткізеді. Канада «Series – 400» ұшағын таныстырады. Ол 19 адамға арналған. Әскери техниканы «Viking Air Ltd» әуе ғарыштық компаниясы шығарады. Көрмеге жыл сайын қатысып келе жатқан Франция да өз өнімдерін көрсетуден қалыс­пайды. Бұл мемлекет дүние жүзі бойынша зымыран жүйелерін шығаратын көшбасшы ел болып саналады. Биылғы шараға Француз Республикасының «MBDA» компаниясы өнімдерінің түр-түрін көрсетеді. Біздің елден «KADEX-2016» көрмесінде бірнеше компа­ния­ның өнімдері ұсынылады. Со­лардың бірі – «Семей инжиниринг» АҚ Т-72 танктерін, жаяу әскердің ЖӘЖМ-1 ұрыс машинала­ры мен БТР-70 броньды транспортерларын дайындап жатыр. Бұл кәсіпорынның броньды танкті техниканы жөн­дейтін және әскери және әскери-инже­нерлік техниканың базасында конверсиялық техниканы дайындайтын зауыты бар. «Қазақстан парамаунт инжиниринг» ЖШС «Ар­лан» минадан қорғана алатын броньдалған автомобильді, арнайы әскерлер, арнайы мақсаттағы жауынгерлер мен әскери полицияға ар­налған доңғалақты машинаны ұсынады. Бұл машина жол таң­дамайды. Қай жермен болса да жүре береді. Дастан КЕНЖАЛИН, «Егемен Қазақстан»