Мәскеудегі тұсаукесер

Жақында Мәскеу қаласының Кино үйінде Қазақстан Республикасы Тұңғыш Президентінің өмір жолы туралы баяндайтын «Көшбасшы жолы» киноэпопеясының бесінші бөлімі болып табылатын Сергей Снежкиннің «Жұлдыздар тоғысқанда» көркем фильмінің тұсаукесері өтті. Жаңа кинотуындының алғашқы ресейлік көрермендерінің арасында танымал саясаткерлер, қоғам қайраткерлері, мәдениет және өнер саласының өкілдері, Ресей киносының шеберлері, жоғары оқу орындарының оқытушылары және студенттері, соның ішінде қазақстандық студенттер болды. Фильм тұсаукесері алдын­да түсіру тобы, Қазақстан Рес­пуб­ликасы Мәдениет және спорт министрі Арыстанбек Мұ­ха­ме­диұлы, Ресей кинематографис­тер одағының төрағасы Никита Михалков, фильм режиссері Сер­гей Снежкин, продюсер Вя­чеслав Тельнов, актерлер Берік Айтжанов, Игорь Угольников және басқалардың қатысуымен баспасөз мәслихаты өтті. Режиссер Сергей Снежкин Ресей көрермендеріне Қазақ­станның Тұңғыш Президенті туралы кинотуындының бесінші бөлімін түсіру жұмысы туралы баяндап берді. – Бұл фильм үш сағатқа со­зылған үлкен эпикалық туынды. Осынау қатпары қалың күрделі шығарманы біз орыс-қазақ-неміс-корей ұжымы болып, америкалық, ағылшын, қытай және араб актерлерінің көмегімен екі жылға жуық уақыт бойы түсірдік. Бұл жұмыс – біздің мақтанышымыз. 26 сәуірде Астанада өткен тұсаукесер рәсімі мені қатты қуантты, өйткені қазақстандық көрермендер туындыны өте жылы, қызығушылық таныта отырып, тамаша қарсы алды. Біздің еңбегіміз зая болмай, қазақ халқының жүрегінен өз орнын тапты деген сөз. Менің ақпаратым бойынша, фильм көрермендер тарапынан үлкен қызығушылық тудырып, Қазақстанда қызу тал­қыланып жатыр. Яғни, көркем фильм ешкімді де селқос көзқа­раста қалдырмайды, – деді Сергей Снежкин. – Бұл жұмыс менің Қазақстанға, оның халқы мен Президентіне деген ыстық сезімдерімнің дәлелі болып табылады. Фильмнің басты мақсаты – қазақ туралы аңыз жасау, қазақтың көркем образы мен мінез-құлқын суреттеу. Және дәл осы жағдайда біз кейіркер етіп алған қазақтың бүгінде қызмет етіп жатқан мінезі таңғаларлықтай терең, санқырлы, үлгі аларлықтай нақты тұлға екендігі біз үшін үлкен сәттілік. Нұрсұлтан Әбішұлы – ниеті ақ және өте адал адам, – деп қосты режиссер. Ол «Жұлдыздар тоғысқанда» көркем фильмінің төрт бөлімнен тұратын кеңейтілген телевизиялық нұсқасы да жарық көретіндігін қаперге салды. Басты рөлді сомдаған Берік Айтжанов туындыны түсіру барысында өте қатты толқығанын тілге тиек етті. – Нұрсұлтан Әбішұлы Назарбаев рөлін сомдау мен үшін үлкен мәртебе және үл­кен жау­апкершілік болды. Бү­кіл түсіру тобын, соның ішін­де біздің актерлеріміздің жаңа мүм­кіндіктерін ашқан Сергей Олегович Снежкинге зор алғы­сымды білдіремін, – деді ол.                  – Мен үшін Елбасын ойнау үлкен мәртебе екендігін қайталап айтқым келеді. Нәтиженің қаншалықты жақсы болып шыққандығын біл­меймін, алайда, біз қолымыздан келгеннің барлығын істеуге тырысып бақтық. Журналистердің сұрақтарына жауап беру барысында Арыстанбек Мұхамедиұлы «Көшбасшы жолы» кинотуындысының 1996 жылы Қазақстанның жаңа елордасын – Астана қаласын салуға арналатын алтыншы бөлімін түсіру жоспарларымен бөлісті. Бұған дейін болашақ Елбасы­ның балалық, жасөспірім және жастық кезі туралы Рүстем Әбді­рашевтің «Балалық шағымның аспаны», «От өзен», «Теміртау» және «Тығырықтан жол тапқан» ат­ты фильмдері жарық көрді. Бесінші бөлімнің түсірілімдері 2015 жылдың маусымы мен 2016 жылдың қаңтары аралығында жүргізілді. Фильмнің негізгі оқи­ға­ларының бірі – 1989 жы­лы орын алған шахтерлер бүлігі Қарағандыда түсірілсе, Астана маңында Горбачевтің егінді ал­қапқа келуі түсірілді. Қызықты ақ­парат: 1986 жылғы Алматы қаласындағы Желтоқсан оқиғасы қысқы Санкт-Петербургте түсіріл­ген болатын. Бұл эпизодты түсіруге 600-ден астам адам қатысты. «Егемен-ақпарат»