Шекспирдің шығармалары 3,6 млн. долларға сатылды

АСТАНА. 26 мамыр. Ұлыбритания астанасы Лондонда арнайы ұйымдастырылған аукционда белгілі ақын, драматург Уильям Шекспирдің шығармалар жинағы 3 миллион 600 мыңға сатылды. Бұл туралы inform.kz-ке сілтеме жасаған egemen.kz тілшісі хабарлады. Мәліметтер бойынша, оның арасында 1623 жылы жарық көрген кітаптар да бар. Бұл аукцион ағылшын қаламгерінің қайтыс болғанына 400 жыл толуына орай ұйымдастырылған. Бәссаудаға қойылған шығармалардың барлығын америкалық коллекционер сатып алған. Алайда, оның есімі жария етілмей, жасырын күйде қалды. Айта кетейік, Уильям Шекспирдің құрметіне орай, Ұлыбританияда бірқатар іс-шаралар өтіп жатыр. РИА «Новости» ақпарат агенттігінің хабарлауынша, осыған дейін Лондон қаласындағы кітапханалардың бірінде көрме ұйымдастырылған. Көрмеде ақын өміріне қатысты көптеген заттар қойылды. Уильям Шекспир – ағылшынның ұлы драматургы әрі ақыны. Өмірінде кем дегенде 12 трагедия , 16 комедия, 6 тарихи хроника жазып кеткен. Оның пьесалары әлемнің барлық тілдеріне аударылған. Шығармалары ағылшын тілінің дамуына зор үлесін қосты. Мәселен, көптеген сөз тіркестері қанатты сөз ретінде күні бүгінге дейін қолданылып келеді. Аян Әбдуәли. Дерек, фото: inform.kz.