Ұрпақ ұмытпайды

Ұлттық ұланның №6655 әске­ри бөлімінде келісімшарт негізінде қызмет атқарған кіші сержант Берік­жан Қалиевтің Ақтөбеде лаң­кестермен соңғы демі біткенше айқасқан ерлігі елге мәлім. Арыстай азаматтың артында аңырап төрт баласы мен аяулы жары Нұрсұлу Қалиева қалды. Сарбаздың сүйегі 8 маусым күні туған ауылы Жақ­сыбайда жерленді. Қаралы жиынға қатыс­қан облыс әкімі Алтай Көл­гінов Елбасының тапсырмасымен отбасына мемлекеттік қолдау көр­сетілетінін айтқан еді. Кеше Мемлекет басшысының тапсырмасы бұлжытпай орындалғанына барша батысқазақстандықтар куә болды. Қалиевтер отбасына Батыс Қазақстан облысының әкімі Алтай Көлгінов Зашаған кентінен жаңа пәтер кілтін табыстады. – Ақтөбедегі қанды оқиғада үш әскери қызметкер қаза тапты. Солардың бірі – жерлесіміз Берікжан Қалиев. Соңында төрт баласы қалды. Елбасымыздың лаңкестік құрбандарының отба­сыларының ешбірі қараусыз қалмасын деген тапсырмасы бойынша жан-жақты қолдау көр­сетілуде. Зайыбы Нұрсұлу Қа­лиева мектепке жұмысқа орналас­ты. Балалары Зашаған кентіндегі мектепте сабақ оқитын болады, кішкентайы шағын орталыққа барады. Отбасына үш бөлмелі пәтер берілді. Оның алдында 5 миллион теңге қаржылай көмек көрсетілді. Алдағы уақытта да назарымыздан тыс қалдырмай, қамқорлық көрсететін боламыз, – деді облыс басшысы. Нұрсұлу Қалиева Елбасы қам­қорлығына ризашылығын білдірді. Ол өз жүрегінің түк­піріндегі ой-тілегін былайша жеткізді: – Елде тек тыныштық пен береке-бірлік болсыншы. Алғысым шексіз. Күні кеше ғана өте шағын пәтерде тұрдық. Қазір бәрі де жеткілікті, – деген ол, сонымен қатар, жарының асыл қасиеттерін еске алды. Жұбайымның мінезі ақжарқын, өте салмақты болды. Ешкімнен қолынан келген көмегін аямайтын. Қызметіне жауап­кершілікпен қарап, жан-тәнімен беріліп істейтін. Балаларына жақсы тәрбие берді. Нұртай ТЕКЕБАЕВ, журналист, Темір ҚҰСАЙЫН, «Егемен Қазақстан» Батыс Қазақстан облысы Суретте: пәтер кілтін тапсыру кезінде