Жерорта теңізінде ай сайын 450 босқын суға кетеді

Жерорта теңізінде ай сайын Еуропаға бағыт алған 450 босқын суға кетеді. Бұл туралы Біріккен Ұлттар Ұйымының бас хатшысы Пан Ги Мун Грекияның Лесбос аралына жасаған сапарында мәлімдеді. «Әлемде күн сайын мыңдаған отбасы өз үйлерін тастап кетеді. Ай сайын 450 адам Жерорта теңізінде қаза табады», – деді Пан Ги Мун. Ол Грекияның премьер-министрі Алексис Ципраспен кездесіп, мемлекеттің босқындарға жасап жатқан көмегін айрықша атап өтті. «Экономикалық қиындықтарға қарамастан Грекия билігі мен халқы бас сауғалап келгендерге мейірімділіктерін көрсетіп, қаншама адамның өмірін сақтап қалды. Біз шекараны жабу туралы мәселеге тоқтау салуымыз керек», – деді Біріккен Ұлттар Ұйымының бас хатшысы. Халықаралық көші-қон ұйымының мәліметі бойынша, 2015 жылдың қаңтарынан бастап бұл ел 1 миллионға жуық мигранттар мен босқындарды қабылдаған. Аян Әбдуәли. Дерек: russian.rt.com. Фото: ryb.ru.