Аршавиннің азаматтығы

Атақты ресейлік футболшы қазақ тілін үйреніп жүр Қазір Алматының «Қайраты» сапында ойнап жүрген Ресей құра­масының бұрынғы шабуылшысы Ан­дрей Аршавин бұл командадан кеткен­нен кейін футболшылық мансабына нүкте қоятын ойы барын жеткізді. Ол биылғы қыста екіжақты келісіммен Краснодардың «Кубанімен» арадағы келісімшартын үзген болатын. Наурыз айында ол «1+1» схемасы бойынша «Қайраттың» ойыншысы атанды. Алматылық клубтан кейін футболшылық мансабын тоқтату ықтималдылығы туралы қойылған сұраққа футболшы: «Негізі, солай болатын шығар», деп жауап берген. 35 жастағы спортшы сондай-ақ қазақ тілін үйренгісі келетін-келмейтіні туралы сұраққа да жауап қайтарыпты. «Мен үйреніп те жатырмын. Шын мәнінде біраз сөздерді білемін. Мысалы, қар дегеніміз – снег, ал орталық – центр. Қазақ тілі – мен үшін қиын тіл, бірақ уақыт өте келе тым болмаса ол тілде жұрттың не айтып жатқанын ұғатын халге жете алатын шығармын деп ойлаймын», – деді Аршавин. Бұдан бұрын Андрей Аршавин Санкт-Петербургтің «Зениті» (1999-2008, 2012, 2013-2015) мен Лондонның «Арсеналында» (2009-2013) өнер көрсеткен. Ол «Зениттің» құрамында Ресейдің үш дүркін чемпионы атанды, екі рет турнирдің күміс медалінің иегері болды, бір-бір реттен УЕФА Кубогы мен Суперкубогын, Ресей Суперкубогы мен премьер-лига Кубогын жеңіп алды. 2002-2012 жылдары Ресей құрамасы сапында хавбек ретінде 75 матч ойнап, 17 гол салды. Команданың капитаны дәрежесінде 2008 жылы Еуропа чемпионатында қола медальға қол жеткізді. Дамир ҚОЖАМҚҰЛ