Алматы облысында жоғалған медбикенің денесі табылды

Алматы облысына қарасты Қарасай ауданында жоғалып кеткен аудандық аурухана медбикесі Гүлнар Есенәлиеваның өлі денесі табылды. 7sunews.kz ақпарына қарағанда, ол бақытсыздық жағдайында кездейсоқ қаза тапқан. Іздестірушілер медбикенің денесін Қаскелең өзенінің арнасынан тапқан. Ол 18 маусым күні медицина қызметкерлерінің мерекесіне байланысты өткізілген корпоративтік кештен кейін жұмбақ жағджайда жоқ болып кеткен. Полиция медбикенің жоғалуына орай бірнеше версияны қарастырып көрді. Соның ішінде бақытсыз оқиға деген болжам көбірек ойға алынды. Сол жоғалып кететін күні әріптестері өзен жағасынан оның сумкасын тауып алған. Ертесіне үлкен ұлы бір туфлиіне кезіккен. Полиция қызметкерлері мен еріктілер оны Қаскелең өзенінің жағасынан іздесе, құтқарушылар өзен арнасын қараған. Нәтижесінде марқұмның денесі оның суға құлаған жерінен екі шақырым төмен аумақтан тауып алған. Гүлнар Есенәлиеваның соңында бірі 22-дегі, екіншісі 11-дегі екі ұлы қалды. Нұрбол ӘЛДІБАЕВ.