25 жылдық мерейтой – жалпыұлттық жауапкершілік

Кеше Ақордада Мемлекеттік хатшы Гүлшара Әбдіқа­лы­қованың жетекшілік етуімен Қазақстан Республикасы Тәуелсіздігінің 25 жылдығын мерекелеу жөніндегі мемлекеттік комиссияның кезекті отырысы өтті. Жиында айтулы жылды айрықша жағдайда ұйымдастыру іс-шараларының жоспары талқыланды. Гүлшара Наушақызы ең алдымен Қазақстанның БҰҰ Қауіп­сіздік Кеңесінің екi жылға тұрақты емес мүшесі болып сайлануына арнайы тоқталды. «Біздің еліміздің БҰҰ Қауiпсiздiк Кеңесiнiң 2017-2018 жылдардағы тұрақты емес мүшесi болып сайлануы – Елбасының, жалпы Қазақстан халқының жеңiсi. Осы жеңiспен сiздердi құттықтаймын», – дедi Мемлекеттiк хатшы. Содан кейін жуырда ғана өткен елдің әлеуметтік-эконо­ми­калық дамуының 4 айлық қорытын­дысына арналған жиында Елба­сының Тәуелсіздіктің ширек ғасырдағы тарихи маңызына айрықша тоқталғанын еске түсірген Г.Әбдіқалықова бұл мерейтой жалпыұлттық деңгейде ұйымдастырылуы тиіс жауапты міндеттің бірі екендігін атап көрсетті. «Біз ширек ғасырлық мерейтой аясында сындарлы үнқатысуға негізделген, кез келген мәселені шешуге қабілетті екені­мізді күллі әлемге танытуымыз қажет және алдағы өршіл мақ­саттарға жұмылған жұдырық­тай бірге ұмтылатын ел екенді­гімізді көрсетуіміз керек. Сон­дықтан да аталған ұлы мерекені жалпыұлттық деңгейде ұйым­дастыру және лайықты өткізу бар­ша­мызға жүктелген жауапты мін­дет болып табылады», – деді ол. Алқалы жиында жыл соңы­на дейін жүзеге асырылатын ме­рекелік шаралар мен ауқым­ды жұмыстар турасында Мә­дениет және спорт министрі А.Мұхамедиұлы жан-жақты айтып берді. Ал Білім және ғылым вице-министрі Б.Асылова мерей­тойлық басқосуларға жас­тар мен жастар ұйымдарын тарту жө­ніндегі, Ақпарат және ком­муникациялар министрі Д.Абаев ақпараттық-имидждік сүйе­мелдеу жөніндегі жоспарларымен бөлісті. Жалпы, Мемлекеттік хатшы бүгінгі басқосу барысында Қазақстан Тәуелсіздігінің ширек ғасырлық мерейтойын ерекше леппен атап өтуді ұйымдастыруда жергілікті жерлер мен ауыл-аймақтарды кеңінен қамту жайы талқыланатындығын ескерткен болатын. Осыған орай, онлайн-режімде өткен отырыста Батыс Қазақстан облысы әкімінің орынбасары М.Тоғжанов өңірде Тәуелсіздіктің 25 жылдығын мерекелеуді ұйымдастыру ісіне тоқталды. Дегенмен, іс-шараларды өткізу бойынша мемлекеттік ор­гандардың жұмысын өзара үйлес­тіру мен ықпалдастықтың негізгі мәселелері жөнінде пікір алмасуда Ақпарат және коммуника­циялар министрі Д.Абаев жетекшілік ететін ведомствоның мақсат-мін­­деттері ауқымды болып шықты. Соның бірі ретінде ол – Тәуел­сіздіктің 25 жылдығын көрсетуде ширек ғасырдағы ел жетістігі ерекше маңызға ие екендігін атап өтті. «Ал ақпараттық науқанның басты қағидаты – халықтың отан­сүйгіштігін арттыруға бағыт­талатын болады. Біз еліміздің негізгі жетістіктерін көрсетуге тыры­самыз. Сондықтан да қазіргі уақытта арнайы түзілген медиа-жоспар аясында жұмыстар жүргізіліп жатыр», деді министр. Оның айтуынша, мұндай медиа-жоспардан бөлек ақпараттық жұмыстардың тәсілін өзгерту де көзделген. «Осы ретте тек медиа-жоспарды ғана пайдаланбай, таргеттеу деп аталатын тәсілді де қолданбақпыз. Яғни, халықтың әрбір санатына жеке-жеке жоба ұсынылады. Меніңше, бұл тәсіл өзін өзі барынша ақтауы тиіс», – деді министр. Сонымен қатар, 25 жылдық аясындағы ақпараттық қолдау шараларының құрамында реалити-шоу өткізу жоспарланыпты. «Осы бағытта арнайы басымдыққа ие 25 ғажап жоба ұсынамыз. Қазір оның барлығы да дайындалу үстінде. Таяу уақытта бұл жобалар теледидардан көрсетіліп, газеттерде жарияланатын болады. Біз еліміздің Тәуелсіздігіне арналған, жүлде қоры қомақты қызықты фотобайқау да өткізбекпіз», – деген Дәурен Әскербекұлы БАҚ өкілдерінің сауалына орай, ел Тәуелсіздігі мерейтойын атап өтуге қосымша қаржы қарастырылмайтынын да қаперге салып өтті. «Барлығы да жоспарланған бюджетке сай ұйымдастырылады. Одан тыс ешқандай қаржы жоспарланып жатқан жоқ. Меніңше, мәселе ақшада емес, ақпаратты ел-жұртқа жеткізе білуде», – деді ол сөзін нықтап. Мемлекеттік хатшы отырысты қорытындылай келе, жоспарланған іс-шараларды сапалы және мерзімінде іске асыру қажеттігін атап өтіп, жұмысты әрі қарай ұйымдастыру жөнінде тиісті органдарға бірқатар тапсырма жүктеді. Нұрлыбек ДОСЫБАЙ, «Егемен Қазақстан»