Ақ жол

Абай музейінен басталады Өмірдің қай «маусымының» бол­­сын өз қызығы мен қуанышы же­­терлік. Дегенмен... табиғат та­мыл­жи бүр жарып, тіршілік иесі жаһанға «мен келдім» деп жар салатын көктемге тең келер не бар?! Ержеткен екі жүректің қуана табысып, екі жастың өмір жолына қол ұстасып, бірге аттанатын шағы қандай ғажайып! Жас жұбайлардың тілекшісі, әлбетте, әрқашан көп. Ал сол екі жас туған отбасында алған өнеге жо­­­лымен үлгі көрсетіп, киелі орын­дарға тағзым етіп жат­са, тіпті, нұр үстіне нұр емес пе?! Абай музейінің шырақшылары сондай бір тағылымды өнегенің куәсі болды. Тағдырларын қоc­қан екі жас Ернар Зұппарұлы Сма­ғұ­­лов пен Маржан Ерманқызы Мұ­қанова некелерін қия салысымен Семейдегі Абай музейіне асық­қан. Ернар болашақ заң­гер, Қазақ инновациялық гума­ни­тарлық заң университетінің студенті, ал Маржан технолог ма­ман­дығын Шәкәрім атындағы заң университетінде меңгеруде. Жас жұбайлар Абай ша­­­­­ңы­­рағын­да естелік үшін суретке түсті, олар­ға му­зей әкімшілігі аты­нан ескерткіш сый­лықтар тапсырылды. Абай музейінің ұжымы Ернар мен Маржанның осы бір тамаша бастамаларының одан әрі жалғасын тауып, алғашқы қадамдарын кие­лі Абай шаңырағынан бастайтын жас отау иелерінің қатары көбейе түсерінен үмітті. Оларды музей ұжымы қашанда қуана қарсы алып, тегін қызмет көрсетуді борыш са­най­ды. Абай арманы – Тәуел­сіздігіміздің баянды болуы да ұлы ақын айтатын «кеудесі сәулелі» жастардың арқасы, ел болашағы да соларға тәуелді. Мемлекеттік Абай музейінің ұжымы өз өмір жолдарын Абай аталарының шаңырағына келіп, Ұлы Дала елінің ұлы ақынына тағзым жасаудан бастаған Ернар мен Маржанға «Қадамдарың құтты болсын, отауларың бақытқа толсын!» деген тілек айтты. «Егемен-ақпарат»