Ақ қауырсынды тауыс көрдіңіз бе?

Шығыс өңірінің сәулеттік-этнографиялық және табиғи-ландшафтты музей-қорығында ақ түсті тауыс пайда болды. Қардай аппақ құстың қос жұбы – жергілікті фаунаның өкілдері. Яғни, музей-қорықтың хайуанаттар бағындағы кәдуілгі түрлі-түсті қанатты тауыстың мекиені басқан жұмыртқаны жарып шыққан. «Бұлар көпшілік ойлағандай альбиностар емес, тауыс тұқымдастардың жекелеген генетикалық желісі. Өте сирек кездесетіндіктен, Шығыс елдері мен Ауғанстанда аса қымбатқа бағаланады. Өйткені, ақ түс – тазалық пен адалдықтың белгісі іспетті», – деді қорық-музейдің фауна бөлімінің меңгерушісі Зайнитдин Шамшиев. Бүгінде тауыстың ерекше түсті екі балапаны да біршама өсіп, тордағы өздерінің көгілдір қанатты туыстарының қасына жіберілді. Бір қызығы, құстардың қауырсындарының түсі болмаса, басқа айырмашылығы жоқ. Сондай-ақ ақ тауыстардың тәбеті жақсы, әр нәрсеге әуес екені байқалды. Мамандардың айтуынша, бұл құстардың мінез-құлқы дәстүрлі тотыдайын таранған туыстарына қарағанда биязы және жаңа ортаға тез бейімделіп кетеді екен. Айтпақшы, қазақта «тотыдайын таранған, сұңқардайын сыланған» деген өлең жолдары ертеден айтылады. Осындағы тотымыз – тауыс. Бабаларымыз қырғауыл тектес тауыстың әдемі қауырсындарын жайып жіберетініне қарап айтқан сияқты. Ал біз попугай мен субтропикалық шымшықтарды тоты құс деп қателесіп жүрміз... Думан АНАШ