Мәдениет және спорт министрі Олимпиада чемпионын құттықтады

Мәдениет және спорт министрі Арыстанбек Мұхамедиұлы отандық бокс құрамасының капитаны Данияр Елеусіновты Рио-де-Жанейродағы Олимпиаданың жеңімпазы атануымен құттықтады. Бұл туралы аталған министрліктің баспасөз қызметі хабарлады. Өз құттықтау хатында министр Данияр Елеусіновтың жеңісі еліміздің миллиондаған азаматы үшін қуанышты сәт болғанын атап өтті. «Құрметті Данияр Маратұлы! Қазақ елінің төл спортына айналған бокстан Олимпиада чемпионы атануыңызбен шын жүректен құттықтаймын! Бұл жеңісіңіз сіздің күшіңіз бен шеберлігіңізге сенген еліміздің миллиондаған азаматы үшін қуанышты сәт болды. Бүкіл әлем халқының алдында аты әйгілі қарсыластарыңызды тізе бүктіріп, шын мықтылығыңызды мойындата білдіңіз. Ал, біз сіз сияқты батырларымыздың арқасында шынайы мақтаныш сезіміне бөлендік. Сіз секілді жүректі, білекті азаматтарымыз барда Қазақстанның әнұраны барша адамзаттың алдында әлі талай рет шырқалып, туы көкке көтерілетініне нық сенімдімін. Қазақ халқының дара ұлдары бастаған команда әрқашан тек жеңіс тұғырынан көрінеді деген ойдамын», – деп хатында Арыстанбек Мұхамедиұлы. Айдар ӨРІСБАЕВ