Өскеменде жаңа нысанның құрылысы басталды

Өскемен қаласында «Нұрлы жол» бағдарламасы бойынша жүзеге асырылатын жаңа нысанның құрылысы басталды. Құрылыстың басталуына орай ұйымдастырылған cалтанатты рәсімге «Самұрық - Қазына» жылжымайтын мүлік қоры» акционерлік қоғамының басқарма төрағасы Бауыржан Мамытәлиев, Өскемен қаласы әкімінің міндетін атқарушы Арман Искаков, сондай-ақ Шығыс Қазақстан облысы әкімдігінің өкілдері қатысты. Басқарма төрағасының мәліметі бойынша, тұрғын үй кешені Өскемен қаласының ең перспективалық аудандарының бірі – сол жағалауда орналасады. Жаңа нысан ІІІ жайлылық санатындағы тоғыз қабатты көппәтерлі үш үйден тұрады. Тұрғынжайлардың ауданы 19,5 мыңнан астам шаршы метрді құрайды. Барлығы 325 пәтер салу жоспарланған. Жобаның жалпы құны 4 миллиард теңгеден астам, оның 80 пайызы «Самұрық - Қазына» жылжымайтын мүлік қоры» тарапынан қаржыландырылады. Құрылыс барысында энергия үнемдейтін материалдар қолданылады. Айдар ӨРІСБАЕВ