Абайдың әжесі Зереге ескерткіш орнатылды

Шығыс жұрты тағы да бір елеулі іс атқарды. Ел тәуелсіздігінің 25 жылдығына орай, қазақтың біртуар ақыны Абайдың әжесі Зереге арналған ескерткіш Жарма ауданының Қалбатау ауылында бой көтерді. Асыл аналарға деген құрмет, ізгілік, ілтипат көрсету жас ұрпақтың бойында патриотизмді қалыптастыру мақсатында «Ұлы даланың ұлы аналары» атты іс шара аясында қолға алынған болатын. Игілікті бастаманың ұйытқысы болған Жарма ауданының әкімі Нұрлан Сыдықов ел аналарына деген құрметтің ескерусіз қалмайтынын айтады. «Ұрпақ сабақтастығын жалғастырушы ұлтты тәрбиелер асыл жандарымызға тағзым ету қашанда парызымыз», – дейді ол. Торқалы тойға қатысқан Құнанбай фильмінде басты рөлді сомдаған Досжан Жолжақсынов өз ойын былай тарқатты: «Жұмақ аналардың табанының астында. Алып анадан туады дейді халқымыз. Әлемнің бар асылы – данышпан ғалым да, сөз бастаған шешен де, ел бастаған көсем де ананың көкірегінен нәр алып, тамыр жаяды. Көркем өнер саласында еңбек еткен адамдарға, аудан жұртышылығына алғысым шексіз». Әдемі үйлесім тапқан мүсіннің бейнесін Ертіс Тәтиев пен оның ұлы Еркебұлан Ертісұлы жасап шыққан екен. Ескерткіште Зеренің алдында бала Абай бейнеленген. Олардың айтуынша, бұл идея романнан алынған үзіндіге негізделіп жасалған. «Абай жолы» роман-эпопеясында Абай әжесі Зеренің тәрбиесінде болғанын, жастайынан қисса дастандарды естіп, көкейіне тоқып өскенін білеміз. Қолы алтын шеберлердің осындай туындылары тарихымыздың ашылмаған сырларын, ақтаңдақ беттерін ақ параққа түсірумен тең. Асылдың сынығы, тұлпардың тұяғы болған ардақты аналарға қандай құрмет көрсетсе жарасымды. Бұл игілікті іс өзге өңірлерде де жалғасын тауып жатса құба-құп. Айман МҰҚЫШЕВА