ДҮБІР

ЖҮЛДЕЛЕР ЖИЫНТЫҒЫ

№	Құрамалар	Алтын	Күміс	Қола	Барлығы
1	АҚШ	46	37	38	121
2	Ұлыбритания	27	23	17	67
3	Қытай	26	18	26	70
4	Ресей	19	18	19	56
5	Германия	17	10	15	42
6	Жапония	12	8	21	41
7	Франция	10	18	14	42
8	Оңтүстік Корея	9	3	9	21
9	Италия	8	12	8	28
10	Австралия	8	11	10	29
21	Өзбекстан	4	2	7	13
22	ҚАЗАҚСТАН	3	5	9	17
31	Украина	2	5	4	11
38	Грузия	2	1	4	7
39	Әзербайжан	1	7	10	18
40	Беларусь	1	4	4	9
42	Армения	1	3	0	4
58	Тәжікстан	1	0	0	1
69	Литва	0	1	3	4
78	Молдова	0	0	1	1
78	Эстония	0	0	1	1

Жамбыл жампозын қарсы алды

Жамбыл жұртшылығы Рио-де-Жанейрода өткен ХХХІ жазғы Олимпиялық ойындардың күміс жүлдегері Елдос Сметовті ерекше құрметпен күтіп алды. Салтанатты шара Тараз – Алма­ты бағытындағы қала қақпа­сында бастау алып, Қазақстан Республикасы Тұңғыш Президенті атындағы саябақта жалғасын тапты. Жамбыл облысының жұрты ел қоржынына алғашқы күні-ақ жүлде салған жампозын қарсы алуға көптеп келді. – Облыстан байрақты бәсеке­лерде топ жарған Жақсылық Үш­кемпіров, Ислам Байрамуков, Бақтияр Артаев, Болат Жұмәділов, Ақжүрек Таңатаров секілді талай тарландар шыққан. Міне, енді сен де осы тұлғалардың қатарына қосылып, төрткүл дүние көз тіккен аламанда қазақ елінің туын көкке желбіреттің. Сенің жеңісіңе бүкіл қазақ елі, Жамбыл жұрты дән риза. Сені шын жүректен құттықтай отырып, алда әлі талай белестерді бағындыруыңа тілектеспіз, – деген Тараз қаласының әкімі Нұржан Календеров Елдос Сметов пен жат­тықтырушысына шапан жапты. Ал Жамбыл облыстық ардагерлер кеңесінің төрағасы Еркінбек Солтыбаев Елдосқа ел болып жанкүйер болғанын айта отырып, ақ батасын берді. Олимпиаданың күміс жүлдегері өз кезегінде барша жанкүйерлерге алғыс білдірді. – Армысың қазақ елі, Жамбыл жұрты! Ең бірінші Жаратқанға, одан соң ата-анама алғысым шексіз. Жаттықтырушыларымның еңбегін де баса айтқым келеді. Маған жанкүйер болып, сенім артқан барша жанкүйерлерге рахмет! Алда талай жеңісімнің куәсі боласыздар деп ойлаймын! – деді Елдос. Салтанатты шара соңында тұрғындар Елдос Сметовпен естелік суретке түсті. Оралхан ДӘУІТ, «Егемен Қазақстан» ТАРАЗ

«Иван сенімді ақтады»

Ел қоржынына қола медаль салған боксшы Иван Дычко Қостанай облысына қарасты Руд­ный қаласында тұрады. Былғары қолғап шеберінің ата-анасы Федор Иванович пен Ольга Вла­димировна, келіншегі Марина мен қызы Мирослава оның рингтегі шайқастарын теледидардан көріп, жанкүйер болды. Ел мен ердің намысы таразыға түскен сәтте спортшының әкесі Федор Иванович ерекше толқыған екен. – Федор Иванович, ұлыңыз шаршы алаңға шыққанда қандай сезімде болдыңыз? – Мен баламның рингтегі барлық кездесулерін тікелей эфирден көрдім. Оның қарсыластары көлденең көк аттының бірі емес. Шетінен мықты, қимылы ши­рақ жүйріктер. Сондай қарсы­ластарға тойтарыс беріп, жеңіс туын жұлып алу айтуға ғана оңай. Жартылай финалдағы бәсе­кеде қатты қобалжыдым. Жек­пе-жек басталардың алдында Иванмен Skype желісі арқылы сөйлескен едім. Ол Рио-2016 Олим­пиа­дасының жөні бөлек екенін айтты. Сондықтан, британиялық боксшы Джой Джойспен өтетін кездесуге барынша мұқият дайындалды. Рингтегі шайқасты Иванның келіншегі Марина мен немерем Мирослава көріп, қолдау көрсетті. Ал анасының қобалжығаны сонша, көгілдір экран алдына жақын­дамады. Немерем алдағы желтоқсан айында екі жасқа толады. Ол әлі бала ғой. Әкесінің боксшы екенін түсінбейді. Бірақ теледидардан көргенде қолын шапалақтап, мәз болды. – Иванның жүлде алатынына сендіңіз бе? – Әрине. Мен жүлде алатынына сендім. Ол сенімді ақтады. Олимпиада медалін алтын, күміс не қола деп бөл­меймін. Ең маңыздысы, ол жүлде алды. Спорт – өмірдің бір бөлшегі. Сондықтан, қуанышты сәттерімен қатар «әттеген-ай» дейтін тұстары да болады. Спорт дегеніміз – бақталас, жанталас. Бірде бақ шабады, бірде бап шабады. Иванның жартылай финалдағы жекпе-жегіне көңілім толады. Ол еліміздің көк байрағын Рио төрінде желбіретті. Мен осындай батыр ұлымды мақтан тұтамын. Бұл жеңіс – барша қазақстандықтардың жеңісі. Иванның жаттығуына көңіл бөл­ген бір топ азаматтардың еңбегі. – Боксшы ата-анасының тілегі қандай? – Рио-де-Жанейро мен біздің еліміздің арасындағы уақыт айыр­­машылығы сегіз сағат. Ол бізден жырақта жүрсе де, жиі-жиі хабарласып тұрады. Бәрімізді алаңдатқан ұйқысыз түндер артта қалды. Арқадан бір жүк түскендей болды. Санаулы күн­дерден соң Иван өз ортамызға оралады. Сол күнді асыға күтіп жүр­міз. Еліміз­дің абыройын ас­қақ­татар спортшыларымыздың са­ны көбейе берсін. Алға, Қазақ­стан! Әңгімелескен Қымбат ДОСЖАНОВА ҚОСТАНАЙ