Көпсалалы аурухана ашылды

Жақында Талдықорғанда қа­ла­лық көпсалалы аурухана ашылды. Айтулы оқиғаға қала тұрғындары мен қонақтары көптеп жинал­ды. Халықтың қуанышын бө­лісуге Алматы облысының әкімі Амандық Баталов арнайы келіп қатысты. Ма­ңызды нысанды сал­ған құ­ры­лысшылар қауымына алғыс айтты. Жалпы аумағы 33885,6 шаршы метр жерді алып жатқан ғимараттың құны 9,3 млрд теңге. 12 бөлім­шеде стационарлық жоғары ма­мандандырылған медициналық көмек көрсетіледі. Әрқайсысы үш қабаттан тұратын 4 корпуста 300 төсектік орын бар. Өңір басшысы дәрігерлерге жауапты міндеттерін абыроймен орындайтындарына сенім біл­дірді. Сондай-ақ, жұртшылық өкілдері де тілектерін айтты. Медицина саласының ардагері Шаймерден Садықов Талдықорғанда осындай заманауи аурухананың ашылғанына риза болып, ақ батасын берді. Қалыптасқан дәстүр бойынша құрылысшылар өкілі жаңадан салынған ғимараттың символикалық кілтін қалалық көпсалалы аурухананың директоры Сәуле Құсмолдановаға табыс­тады. Салтанатты жағдайда облыс әкімі Амандық Баталов ауру­ха­наның 7 дәрігеріне пәтер кілттерін тапсырып,  жұмыстарына сәттілік тіледі. Нұрбол ӘЛДІБАЕВ, «Егемен Қазақстан» ТАЛДЫҚОРҒАН Суретті түсірген Жұмабай Мұсабеков