Бүгін еліміздің батысында аптап ыстық болады

Ішкі істер министрлігі Төтенше жағдайлар комитетінің хабарлауынша, Атырау, Ақтөбе, Маңғыстау облыстарында аптап ыстық күтіледі. Ал республикасының басым бөлігінде ауа райы жауын-шашынсыз болады. Тек еліміздің оңтүстік шығысы және солтүстік-батысында атмосфералық фронтальды бөліктердің өтуіне байланысты кей жерлерінде жаңбыр жауып, найзағай ойнайды. Сонымен қатар, оңтүстік-шығыста бұршақ жаууы мүмкін. Оңтүстік пен батыста жел күшейіп, шаңды дауыл болады. Солтүстік және орталық Қазақстанда түнде және таңертең тұман түседі. Оңтүстік Қазақстан, Қызылорда, Маңғыстау, Атырау облыстарының кей жерлерінде жел 15-20 м/с күшейеді, шаңды дауыл тұрады. Сондай-ақ Жамбыл облысының кейбір аумағында күндіз жел 16-21 м/с күшейіп, бұршақ болуы ықтимал. Күндіз Алматы облысында жел 15-20 м/с күшейеді. Айта кетейік, Ақтөбе, Қызылорда, Оңтүстік Қазақстан, Атырау, Батыс Қазақстан, Қарағанды, Қостанай, Жамбыл, Алматы облыстарында өте жоғары өрт қауіпі сақталады. Талғат РАЙЫМБЕК