Мүмкіндігі шектеулі жандарға электронды қол арбалар берілді

Оңтүстік Қазақстан облысының Кентау қаласында мүмкіндігі шектеулі азаматтарға өздігінен жүретін қол арбалар табыс етілді. Электронды арба күн сәулесінен қуат алады, әрі оны тоқ көзіне жалғап та қуаттауға болады. Аккумулятордың күші 30 шақырымға дейін жетеді. Қол арбаны қазақ түрік университетінің оқытушылары мен студенттері құрастырып шығарған. Мүмкіндігі шектеулі жандардың қауіпсіздігін ойлаған олар құрастырушы бөлшектердің сапалысын таңдаған. Қайырымдылық шарасы аясында 20 адамға арба тегін таратылды. «Мен осындай мүмкіндігі шектеулі жандарға көмек қолын созғаныма өте қуаныштымын. Енді жүре алмайтын адамдар арбаның көмегімен діттеген жеріне жете алады. Әзірге Шымкент, Кентау, Түркістан, Төрткүл қаласының тұрғындарына бердік. Келешекте тағы 100 дана жасаймыз деген жоспарымыз бар», – деді өнертапқыш Ферхад Чайыр. Айман МҰҚЫШЕВА