Жанұзақ ауылына − жасанды футбол алаңы

Жексенбі күні алыстағы Айыр­тау бөктерінде жатқан Жанұзақ ауылының тұрғындарын қуантқан оқиғаға куә болдық. Алақандай ауылда Парламент Мәжілісінің депутаты Берік Дүйсембиновтің тікелей жетекшілігімен салынған жасанды футбол алаңы салтанатты түрде пайдалануға берілді. Айта кету керек, жаңа нысан «Ақ жол» демо­кратиялық партиясының пар­ламенттік фракциясының қол­дауымен салынды. Мұнда спорт алаңына ар­налған барлық техникалық талап ескерілген. «Ақжолдық» депутаттардың қар­жысына тұр­ғызылған заманауи нысанның кө­лемі 50/25 метрге тең. Жасанды га­зонмен жабылған жасыл алаңда асыр салған ауыл бүлдіршіндерінің қуанышында шек жоқ. Біз барғанда жаңа кешенде ауыл командалары арасында футболдан турнир өтіп жатыр екен. – Спортшыларымыз Олим­пиада ойындары мен әлемдік жарыстарда үздік нәтижелер көрсетіп жүр. Спорт – еліміздің мәртебесі, жастарымызға үлгі. Сондықтан, Мемлекет басшы­сы Нұрсұлтан Назарбаев айтқандай, әр қазақстандық саламатты өмір салтын ұстанып, спортпен шұ­ғылдануы тиіс. Дегенмен, бұқа­ралық спорт түрлерінің өзі қа­рапайым тұрғындарға қолжетімді бола бермейді. Сондықтан бұл футбол алаңы – біздің ауыл ба­лалары мен жасөспірімдер спортын дамытуға қосқан үле­сіміз болмақ, – деді Берік Дүй­сембинов. Аталған шараға Мәжіліс депутаттары Азат Перуашев, Кеңес Абсатиров пен Болат Өтепбаев, Арман Сқабылұлы, Рахат Алтай сынды партия мүшелері және аудан жұртшылығы қатысты. Думан АНАШ, «Егемен Қазақстан» Шығыс Қазақстан облысы, Ұлан ауданы