Қырғыз Республикасы Қарулы күштері Бас штабының Балықшы қаласындағы «Эдельвейс» полигонында Шанхай ынтымақтастық ұйымы мүше мемлекеттерінің «Бейбіт миссия-2016» бірлескен әскери лаңкестікке қарсы командалық-штабтық оқу-жаттығуының ресми ашылуы өтті.
Салтанатты іс-шараға бес елдің, яғни Қазақстан Республикасы, Қырғыз Республикасы, Қытай Халық Республикасы, Ресей Федерациясы және Тәжікстан Республикасы Қарулы күштерінің әскери контингенттері қатысты.
Жалпы алғанда, оқу-жаттығуға 2 мыңға жуық әскери қызметші, шамамен 300 бірлік әскери техника жұмылдырылса, олардың біршамасы жаңғыртылған және заманауи қондырғымен жабдықталған, сондай-ақ, құрлық әскерлерінің іс-қимылын қалқалауды қамтамасыз етуге арналған 40-қа жуық жауынгерлік авиация тартылды.
«Мұндай оқу-жаттығулардың өткізілуі қазіргі заман талабына сай әрі ШЫҰ жауапкершілігі өңірінде және жалпы әлемде қалыптасқан халықаралық жағдай негізінде өзінің өзектілігі мен маңыздылығын талай мәрте дәлелдеген», – деп «Бейбіт миссия-2016» бірлескен оқу-жаттығуының жетекшісі полковник Р.Мұқамбетов айтып өтті. – Оқу-жаттығудың қойылған мақсаттарына қол жеткізу үшін бірге барынша күш-жігерімізді салатынымызға сенімдімін. Себебі, қазіргі оқу-жаттығулар «жауыздықтың үш күшімен», яғни лаңкестікпен, экстремизммен және сепаратизммен күресуден басқа, мемлекеттеріміз Қарулы күштерінің анағұрлым тығыз әскери ынтымақтастығына ықпал етеді».
Қазақстаннан оқу-жаттығуға Қазақстан Республикасы Қарулы Күштері Аэроұтқыр әскерлерінің әскери қызметшілері қатысуда.
«Егемен-ақпарат»
