Қызылордада Ақтөбе облысының күндері өтуде

Сенбі күні, 15 қазанда Ақтөбе облысы делегациясының бағдарламасы қаланың өндірістік нысандарын аралап, театрландырылған қойылымдарды тамашалаумен жалғасты. Қонақтар «Orda Glass» ЖШС шыны табақшаларын шығаратын зауытының құрылыс алаңына (2017 жылы пайдалануға беріледі) және «Жан-Арай» ЖШС агроиндустриалды кешеніне барды. Осы күні Ақтөбедегі Қ.Жұбанов атындағы мемлекеттік университетінің студенттік театрының, С.Бәйішев атындағы Ақтөбе университетінің жастар театрының қойылымдары ұйымдастырылды. Сондай-ақ, Т.Ахтанов атындағы Ақтөбе облыстық драма театры ұжымының спектаклі көрсетілді. «Тағзым» алаңында көрші аймақтың тауар өндірушілерінің ауылшаруашылығы өнімдері  жәрмеңкесіне барды. Ақтөбе облысының шаруалары сатылымға картоп, тары, басқа да көкөніс түрлері, жеміс-жидектер, ет-сүт және өзге де бақша өнімдерін әкелді. Бұдан бөлек, жәрмеңке барысында спорттық жарыстар ұйымдастырылып, шығармашылық ұжымдардың өнері көрсетілді. Естеріңізге сала кетейік, Б.Сапарбаев бастаған Ақтөбе облысының делегациясы Қызылорда облысына аймақаралық ынтымақтастықты нығайту мақсаты аясында келген болатын. Аймақтар әлеуметтік-экономикалық дамудың әртүрлі салалары бойынша тәжірибе алмасты.