Бейбітшілік ордасына – 10 жыл

Халық арасында «Пирамида» аталып кеткен Бейбітшілік және келісім сарайының ашылғанына 10 жыл болды. Аталған ғимарат еліміздегі достықтың, бірлік пен бейбітшіліктің белгісі іспетті. Бейбітшілік және келісім сарайы туралы идея Елбасы Нұрсұлтан Назарбаевқа тиесілі. Мемлекет басшысы бұл идея туралы 2003 жылы Әлемдік және дәстүрлі діндер көшбасшыларының тұңғыш съезінде айтқан еді. Сөйтіп, екінші съезд Пирамидада өткізілді. Сарайдың ашылу салтанатында әлемдік опера әншісі Монсеррат Кабальенің сахнада өнер көрсеткені де ел есінде. Бейбітшілікті темірқазық еткен сарайда конфессияаралық форум өткізіліп, оның жұмысына Дүниежүзілік Ислам Лигасының Бас хатшысы Шейх Ат-Түрки, Орыс православие шіркеуінің Патриархы Алексий ІІ, Израильдің Бас ашкеназий раввині Иона Мецгер және басқа да көптеген діни көшбасшылар қатысты. Бейбітшілік және келісім сара­йында жыл сайын ауқымды шаралар, соның ішінде өнердің шыңы саналатын опера әншілерінің концерті, сирек кез­десетін өнер туындыларының көрме­лері ұйымдастырылады. Аталған орда Ас­тананың мәдениетін дамытуға өзіндік үлес қосып келеді деп толық айтуға болады. Тағы бір тілге тиек етер жайт, Бей­біт­шілік және келісім сарайында Түркі әлемі ғылыми мекемелерін үйлестіріп, көптеген зерттеу жобаларын жүзеге асырып отырған Халықаралық Түркі академия­сы, танымал түркологтардың ондаған мың кітабы мен қолжазбалары сақталған Түркі академиясының кітапханасы мен музейі, Қазақстан халқы Ассамблеясының этно­мәдени бірлестіктері, «Құланшы» қазір­гі заманғы өнер орталығы, Халықара­лық мәдениет және дін орталығы  орналасқан. Бейбітшілік және келісім сарайының авторы – белгілі британдық сәулетші Норман Роберт Фостер. Суретші Брайан Кларктың нағыз өнер туындысы – Қазақстан жерінде тұратын ұлттар мен ұлыстарды білдіретін 130 көгершін бейнеленген вит­раж Пирамиданың ұшарбасының көркін келтіріп тұр. Ғимараттың жылжымалы қаңқасы жергілікті климатты ескере отырып жасалған, ал лифттер 60 градус көлбеу диагональмен қозғалады, мұндай лифттер Эйфель мұнарасында және Лас-Вегаста «Люксор» қонақ үйінде ғана бар. Мерейтойға арналған гала-концерт «Pyramid Dance Group» шығармашылық би тобының жарқын мюзиклімен ашылды. Пирамиданың құрылысы туралы театрландырылған қойылым мен оның қызметі туралы үзінділер көрермендер назарына ұсынылды. Этномәдени бірлестіктердің көркемөнерпаздары шараға қатысып, өз өнерлерін ортаға салады. Нұрлыбек Досыбай, «Егемен Қазақстан»