«Қазығұрттың» қарсыласы – «Пари Сен-Жермен»

Кеше УЕФА-ның әйелдер командалары арасындағы Чемпиондар лигасы 1/8 финалдық раундының жеребесі тартылды. Нәтижесінде Қазақстан клубтары арасынан жарыстың осы кезеңіне шыққан бірінші ұжым атанған Шымкенттің «БИИК-Қазығұрты» Париждің «Пари Сен-Жерменімен» күш сынасатын болды. Біздің қыздар бірінші кезде­суін қарсыластар алаңында 9 қараша күні өткізеді. Ал қарымта ойыны 17 қарашада Шымкентте ойналады. Осы ретте бұған дейінгі топтық ойын­дарда Испанияның «Бар­селонасы» мен Гер­манияның «Франкфуртін» ұтып, 1/16 финалда Италияның «Ве­ронасын» жарыс жолынан шығарып тастаған жер­лес­теріміздің кім-кімге де оңай шағылатын жаңғақ бола қой­масын айта кетуіміз керек. Оның үстіне, команданың соңғы матчты өз алаңында өткізетіні біраз үміттің қоламтасын үрлеп бергендей болып отыр. Турнирдің бұл кезеңінде сондай-ақ, Чемпиондар лига­сының қазіргі чемпионы «Лион» (Франция) алдымен өз үйінде Швейцарияның «Цюрихімен» кездеседі. Ал Германияның «Ба­вариясы» Ресейдің «Россиян­касын», Швецияның «Эскиль­с­туна Юнайтеді» немістің «Вольфсбургін» өз алаңдарында қабылдайды. Бұлардың бәрі алғашқы матчтарын 9 қарашада өткізіп, плей-офф ойындарын 17 қарашада аяқтайды. Сол сияқты 10 қарашада «Бар­­селона» (Испания) – «Твен­те» (Нидерланд), «Манчестер Си­ти» (Англия) – «Брондбю» (Да­ния), «Славия» Прага (Чехия) – «Русенгорд» (Швеция), «Бре­шия» (Италия) – «Фортуна» Йорринг (Дания) командалары өзара ұшырасады. Бұлардың қарымта ойындары 16 қараша күні ойналады.   Руслан ИГІЛІК