Саусақ ізін тіркеу сақтық үшін қажет

Қазір қоғамда «Дактилоскопиялық және геномдық тіркеу туралы» заң жобасы қызу талқылану үстінде. Ішкі істер органдарының ұйытқы болуымен әзірленіп жатқан бұл заңға байланысты бірнеше рет тыңдау өтіп, оны талқылауға мемлекеттік органдар мен БАҚ, кәсіподақ және өзге де ұйым өкілдері, сондай-ақ сарапшылар, сала мамандары қатысқан болатын. Бұл туралы Орталық коммуникациялар қызметінде өткен брифинг барысында ІІМ Жедел-криминалистика департаментінің бастығы Серік Сайынов баяндап берді. Аталмыш заң жобалары ағымдағы жылдың маусым айында өткен Қауіп­сіздік Кеңесінің отырысында Мемлекет басшысының арнайы тапсырмасы бо­йынша әзірлену үстінде. «Сондықтан да біз «Дактилоскопиялық және геномдық тіркеу туралы», «Кейбір заңнамалық акті­леріне дактилоскопиялық және геномдық тіркеу мәселелері бойын­ша өзгерістер мен толықтырулар енгі­зу туралы» заң жобаларын e.gov.kz ашық нормативтік актілер интернет-пор­талында және ІІМ-нің ресми порталында жарияладық. Бұл жерде көздел­ген мақсат – заңның қоғам ішінде тал­қылану үдерісін мейлінше кең ауқым­да жүргізу болатын», – дейді Серік Сайын­ұлы. Маман пікіріне сүйенсек, мұн­дай заң жобасы жеке басты куәлан­ды­ра­тын құжаттарға адамның био- ме­триялық анықтамаларын сәйкес­тен­дірудің заманауи технология­сын енгізу қажеттілігінен туындап отыр­ған көрінеді. Ал қоғамдық кеңес мү­шелері болса, биометриялық паспорт­тық-визалық құжаттарға осы қосымша дактилоскопиялық параметр енгізу биометриялық анықтауды сәйкес­тендіру жүйесін құру мен енгізуге мүм­кін­діктер береді. Сондай-ақ, құжат­тарды жалған жасаудың жолын кесіп, олардың иелерін алаяқтық пен түрлі қылмыстық әрекеттерден қорғайтынын айтады. Сонымен қатар, жаңаша үлгі­дегі ақпараттық жүйе қызмет көрсе­ту түрлерін кеңейтіп, визалық режім­ді жеңілдетеді және көші-қон қауіп­сіз­дігінің тиімділігін арттырады. Негізінен, Қазақстанда жеке бас пен отбасын куәландыратын он бір құ­жаттың жетеуі құжат иесі туралы ақпарат берді. Бұл ретте биометриялық құжаттар ICAO халықаралық стандарттарға сәй­кес келетіндігін де айта кетейік. Оларда адамның беті жаһандық биометриялық технология арқылы танылады әрі оған қосымша әрбір мемлекет факультативті түрде саусақ іздерін тану технологиясын пайдалана алады. Нұрлыбек ДОСЫБАЙ, «Егемен Қазақстан»