Елбасы «CNBC Arabia» телеарнасына сұхбат берді

Мемлекет басшысы сұхбат барысында Сириядағы жағдайды тезірек шешу үшін осыған мүдделі барлық мемлекеттер бір мәмілеге тоқтауы тиістігін айтты. Осы сұхбаттан бейне-үзінді Президенттің баспасөз қызметінің фейсбуктегі парақшасында жарияланды. Телеарна тілшісінің «Сирия мәселесі өте күрделі. Әлі шешімін тапқан жоқ. Сіздің ойыңызша, Сириядағы дағдарыс жақын арада өз шешімін таба ма, әлде ұзаққа созыла ма?» - деген сұрағына Қазақстан Президенті: Ең бірінші, барлық мүдделі мемлекеттер келісіп, бір жерден сөз шығаруы қажет. Әсіресе, араласып жатқан үлкен мемлекеттер. Өкінішке орай, әрқайсысы өздерінің мүддесін қорғап, әртүрлі жағдаймен кіріседі. Әрқайсысының өз мүддесі бар. Лаңкестікке қатысып жүрген адамдар соны қолданады. Біріне бірін қарсы қояды. Сондықтан, менің ұсынысым - БҰҰ аясында бүкіл дүниежүзілік қоғамдастық бірлесіп лаңкестікке қарсы тұрып, Сирияның мәселесін шешуі керек. Басқа жол жоқ деп санаймын. Себебі, бұл барлық мемлекеттерге қауіп. Бізді білмейтін басқа дүние, Батыс елдері мұның барлығы мұсылмандардан шығып отыр деп ойлайды. Лаңкестік пен мұсылманның арасында ешқандай да теңдік (байланыс) жоқ. Барлық елдер бірігіп қарсы шықса, оны жеңуге болады»,- деп жауап берген. Елбасы сұхбат барысында еліміздің БҰҰ Қауіпсіздік кеңесінің 2017-2018 жылдардағы тұрақты емес мүшелігіне, ядролық қаруды таратпау ісіндегі күш-жігеріне және республиканың әлеуметтік-экономикалық дамуына қатысты қойылған сұрақтарға да жауап берді.