Велошабандоздың таңғы жаттығуы

Петропавлда 2017 жылғы Бүкіләлемдік қысқы Универсиадаға арналған іс-шара болып өтті. Оған Рио Олимпиадасына қатысушы, «Astana Pro Team» велоклубының белді мүшесі, жерлесіміз Бақтияр Қожатаев арнайы келді. Алауды тұтату рәсімі 25 қаңтар күні  Астанадағы Зият­керлік мектебінде Елбасы Нұрсұлтан Назарбаевтың қаты­суымен өте­тіні белгілі. Қызылжар – алау эстафетасын қабылдайтын алғаш­қы өңір. 26 қаңтар күні  aлау эстафетасы  ең бірінші болып Петропавл қаласына келеді.  Қазіргі таңда осыған орай мұнда дайындық жұмыстары жүріп жатыр. 60 азамат алауды өңірдің 12 ша­қырымға созылатын ең көрікті жерлерімен алып өтеді. Ал байрақты бәсекеге облыстан 9 спортшы қатысып, конькимен жүгіруден және шаңғыдан бақтарын сынайтын болады. Қаладағы  қазақ мектеп-гимназиясында бірінші өткен «Универсиадаға дейін 100 күн» мәдени-спорт жобасы аясында белгілі спортшымен таңғы  бой сергіту жаттығуына жүзден астам оқушы қатысты. – Мұндай шаралардың спортты насихаттауда, бала­лар арасында саламатты өмір салтын қалыптастыруда ма­ңызы зор. Еліміз қысқы Уни­версиада қаты­сушыларын ал­ғаш рет қабыл­дайтындықтан, жан-жақты  әзірлік жоғары дең­гейде жүргізілуде. Қазақ­стан­дық спортшылардың барын­ша көп жүлде ұтып аларына сенемін, – дейді Қазақстан ұлт­тық құрамасының мүшесі Б.Қожатаев. Қысқы Универсиаданы қол­дау мақсатында ұйым­дас­ты­рылған аймақтық  акция бес жүзден астам білім ошақтарында жалғасты. Өмір ЕСҚАЛИ, «Егемен Қазақстан» ПЕТРОПАВЛ