Әлеуметтік әріптестік аясында

Қазіргі уақыттағы ең маңызды мәселенің бірі – халықты жұмыспен қамту. Ақтөбе облысында бұл мәселеге ерекше мән беріліп отыр. Соның нәтижесінде еңбекпен қамтылғандар қатары артты. Биылдың өзінде облыс бо­йынша 22 221 адам жаңа жұмысқа орналасты. – Елбасының тапсырмасына сәйкес, жұмыссыздардың өсуі­не жол бермеу үшін барлық мем­лекеттік бағдарламаларды пайдалануымыз керек. Бұл бағыттағы жұмыстарды жүзеге асыру үшін 10 миллиард теңге қаржы бөлінді. Осы қаржыны барынша тиімді пайдалануымыз қажет, – деді облыс әкімі Б.Сапарбаев «Жұмыспен қамтудың жол картасы-2020» бағ­дар­- ламасының орындалуына байланысты өткізілген жиында. Облыста «Нұрлы жол», «Биз­нестің жол картасы-2020», «Жұ­мыспен қамтудың жол картасы-2020», «Өңірлерді дамыту», «Аумақты дамыту» бағдарламалары аясында 1458 адам еңбекке тартылды. Мұнан бөлек 7124 адам бос жұмыс орындарына орналасты. Ағымдағы жылы облыста «Жұмыспен қамту жол картасы - 2020» бағдарламасын іске асыруға 9366 млн теңге қаржы бөлінді. – Бағдарламаның бірінші ба­ғы­ты бойынша жүзеге асырыл­ған 350 жобаға 5890 миллион теңге, ал екінші бағытқа 2510 миллион теңге қаржы бөлінді. 913 шаруа 2147 миллион теңге көлемінде ша­ғын несие алып, соның нәтижесінде 770 жұмыс орны ашылды. Сондай-ақ, бағдарлама аясында 210 адам кәсіпкерлік бойын­ша қосымша білім алды. Ал «Жұ­мыспен қамту жол картасы - 2020» бағдарламасының үшінші бағытын жүзеге асыруға 930,3 мил­лион теңге бөлінді. Сонымен қа­тар, биыл кәсіби оқытуға 321 адам жіберілді. Оның ішінде 113-і кәсіби оқытуға барса, 208-і қайта даярлау курстарынан өтті, – деді жиында облыстық жұ­мыспен қамтуды үйлестіру және әлеуметтік бағдарлама­лар басқармасының басшысы Қайрат Отаров. Оның айтуынша, бағдарла­ма аясында 288 адам қоғамдық еңбекке тартылып, 288 адам тұрақты жұмыспен қамтылған. 540 ақтөбелік жастар іс-тәжірибесіне жіберілген. Сонымен қатар, облыс­та 6118 адамды жұмыспен қам­ту іс-шарасына жергілікті бюджеттен 764,5 миллион теңге қа­ржы бөлінген. Әлеуметтік жұмыс орындарына – 1376, жастар тәжірибе­сіне – 1369, қоғамдық жұмыстарға 7604 адам қабылданған. Алдағы уақытта халықты жұ­мыс­пен қамтуға бағытталған кеше­н­- ді жоспар аясында жүргізілетін іс-шаралар жалғасын табады. Сондай-ақ, бүгінгі күні еңбек на­­рығындағы тұрақтылықты қам­та­масыз ету іс-шаралары қолға алы­нып, жұмысшыларын боса­туы мүмкін мекемелер мен ұйым­дарға апта сайын мониторинг жүр­гізілуде. Сонымен қатар, еш жерде тіркелмеген жұмыссыздар туралы мәліметтер де жинақталып жатыр. Айта кету керек, бүгінде облыста әлеуметтік әріптестік жө­нінде үшжақты комиссия мен әлеу­меттік-саяси тұрақтылықты қам­тамасыз ететін және еңбек дау­ларын ескертетін облыстық штаб жұмыс істейді. Сатыбалды СӘУІРБАЙ, «Егемен Қазақстан» Ақтөбе облысы