Жастар тіркеу туралы әлеуметтік желілерден білген

Осы күндері еліміздің түкпір-түкпірінде азаматтарды тіркеу мәселесіне қатысты құқық қорғаушылар мен заңгер мамандар тарапынан түсіндіру жұмыстары жүргізіліп жатыр. Соған байланысты Л.Н.Гумилев атындағы Еуразия ұлттық университетінің студенттері арасында да арнайы сауалдама өткізілді. Әлеуметтік ғылымдар факультеті деканының студенттермен жұмыс жөніндегі орынбасары Людмила Титихмаева ұсынған деректерге көз жүгіртсек, сауалдамаға қатысқан жастар, ең алдымен, тіркеу туралы мәліметті түрлі әлеуметтік желілер арқылы естіп, білген. Уақытша және тұрақты тіркеу туралы заң талабына қатысты жеті сұрақтан құралған сауалдама­ға уни­вер­ситет қабырғасындағы ака­де­мия­лық топтың студенттері қатыс­­тырылған. Атап айтқанда, жастардың 35 пайызы заң туралы ақпаратпен, ата-аналары арқылы құлағдар болса, 5 пайызы таныстары мен достарынан, 5 пайызы түрлі дереккөздер арқылы (пәтер иелері мен учаскелік инспек­торлардан) хабардар болған. Соның ішінде, ең маңыздысы әрі ең көбі – 55 пайыз жастар мұндай мәліметтерді әлеуметтік желілерден оқып, таныс­қаны белгілі болып отыр. Сондай-ақ, сауалдама барысын­да кейбір жастар (10 пайыз) тіркелу туралы естіген соң, өз еріктерімен заң жобасына қызығушылық таны­тып, интернет арқылы тереңірек әрі нақты мәліметтер білуге ынта таныт­қан. Ал енді осы мәселенің түйі­нін тарқатуда алдымен кімнің көме­гіне жүгінесің деген сауалға, сту­ден­т­тердің 25 пайызы ата-ана­сын­а баруды жөн санаса, 45 пайызы кура­тор мен университеттегі құжат­тан­дыру бөліміне немесе ХҚО-ға мәлі­мет алу үшін баратындығын айт­қан. Қалған 30 пайыздың жар­ты­сы бұл жағдайға қатысты мәсе­лені өзі шешетіндігін білдірсе, екін­ші жартысы тіркеуге қатысты про­блема туындамайтындығына сенімді екендігін жеткізіпті. Сауалдамаға қатысқан студент­тердің 85 пайызы тіркеуде тұрға­ны анықталған және өзгелері жақын күндері тіркеуге тұруға қам­да­нып жүргені белгілі болған. Со­ның ішіндегі жастардың 5 па­йы­­зын­да бұл мәселе бойынша белгілі бір деңгейде сұрақ бар екен. Ал енді сол 5 пайыздық мәсе­лені егжей-тегжейлі талқылап, таразылап көрсек. Сұраққа жауап берушілердің бірқатары, уақытша тіркеуге тұру үшін пәтер иелерінің ел аумағында жарты жылға дейін болмайтындығын баяндайды. Сол сияқты, табылған пәтер иелерінің кейбірі студентті уақытша тіркеуге тұрғызғаны үшін төленетін комму­нал­дық төлемдерден қауіптене­тіндігі белгілі болған. Қалай болғанда да, соңғы күндері жағдайдың жай-жап­сарын жөн-жосығымен елге ек­шеп түсіндіру мақсатында құқық қор­ғау органдары өкілдері осы бағыт бойынша белсенді жұмыс жүргізуде. Кез келген сауалға халық көп жиналатын қоғамдық орындар мен ХҚО секілді мекемелерде маман­дар жауап беруге әзір екен­дігін де айта кеткеніміз жөн. Нұрлыбек ДОСЫБАЙ, «Егемен Қазақстан»