Әлеуметтік нысандар құрылысы – басты назарда

Мәжілістегі «Нұр Отан» партия­сы фракциясы әлеуметтік инфра­құрылымды дамытудың 2015-2019 жылдарға арналған «Нұрлы жол» мемлекеттік бағдарламасын іске асыруға бюджеттен және Ұлттық қордан бөлінетін қаражаттың нысаналы және тиімді пайдаланылуын бақылау жөніндегі комиссияның отырысы болды. Оны комиссия жетекшісі Ирина Аронова жүргізіп отырды. Негізгі баяндаманы Білім және ғылым вице-министрі Эльмира Суханбердиева жасап, білім беру нысандарының құрылысы бойынша айтып берді. «Нұрлы жол» бағдарламасы бойынша 2015-2017 жылдар аралығында 57,4 млрд теңгеге 110 білім беру нысанының құрылысын жүргізу қарастырылған екен. Олардың – 91-і мектеп, 19-ы – балабақша. 2016 жылдың қорытындысы бойынша 52 білім беру нысаны пайдалануға берілген, соның ішінде 35-і – мектеп, 17-сі балабақша болған. 27 мектеп үш ауысымды қысқартуға, 8-і апатты жағдайдағылардың орнына салынған. 2017 жылға 56 мектеп пен 2 балабақша салу жоспарланған. 2017 жылдың 1 қаң­тарына дейінгі жағдай бойынша бағ­дар­ламаны толықтай іске асыру үшін жергілікті атқарушы органдарға 57 млрд 371,8 млн теңге аударылған. Бұл – барлық бөлінген қаражаттың 99,9 пайызы деген сөз. Қаражаттардың игерілмеуі Атырау және Шығыс Қазақстан облыстарында орын алған. Баяндамашыға құрылысы бір жылдан келесі жылға созылған нысандар туралы сұрақтар көп қойылды. Мәселен, Ирина Аронова ондай құрылыстардың Алматы облысында тым көп екеніне назар аударды. Барлық 15 мектептің 5-уі 31 қаңтарға берілуге тиісті болған. «Алайда, олардың ашылуының ауылы алыс екенін біз жуырда өз көзімізбен көріп келдік. Осындай нысандарды қалай қадағалайсыздар?» – деп сұрады депутат. «Біз оны наурыз айында толықтай қабылдап, сіздерге фотосуреттерін көрсететін боламыз», – деді министрліктің өкілі. Комиссия жұмысының қорытындысы бойынша Үкіметке ұсыныстар жасалатын болды. Жақсыбай САМРАТ, «Егемен Қазақстан»