Отандық кәсіпкерлер үлес қосады

«Астана ЭКСПО-2017» ұлттық компаниясы» АҚ пен «Атамекен» ұлттық кәсіпкерлер палатасы ынтымақтастық туралы меморандумға қол қойды. ЭКСПО-2017 халықаралық мамандандырылған көрмесіне  дайындық жұмыстары мен ұйымдастыру ісіне қазақстандық бизнесті тартуды мақсат еткен құжат аясында қызмет көрсету саласында жергілікті мазмұнды ұлғайту, әсіресе, өңірлердегі шағын және орта бизнесті тарту мәселесі қарастырылмақ. Жиында «Астана ЭКСПО-2017» ұлттық ком­па­­ниясының басшысы Ахмет­жан Есімов Астанада ұйым­дас­тырылатын көрме баламалы қуат көздерін пайдалану са­ла­сындағы тың дүниелерді тал­­­қылайтын әлемдік алаң­ға айналатындығын айтты. Сондай-ақ, ұлттық жо­ба мем­лекетіміздің инно­ва­ция­лық дамуына серпін бе­реді. «Көрме, шын мәнінде, отан­дық кәсіпкерлікті қолдауға бағытталған ұлттық жобаға айналды. Жұмыс орындарын сақтап қалуға ғана емес, 50 мың жаңа жұмыс орнын ашуға мүмкіндік берді. Жұмыстың қызған уақытында құрылыс алаңына 14 мыңнан астам адам және 500-ге жуық техника жұмылдырылды. Нысандар құрылысына 366 отандық та­уар өндірушілермен 52,5 млрд теңгеге келісімшарт жасалды», деді А.Есімов. Ұлттық компания басшы­сы халықаралық шара қыз­мет көрсету саласындағы отан­­дық кәсіпкерлер біре­гей мүмкіндік екенін де жет­кізді. «ЭКСПО жаһандық на­рық­тың ілгерілеуіне, отан­дық брендтердің танылуына, коммерциялық бай­ла­ныстардың дамуына сер­пін береді. Біздегі туристік ин­дустрияның қарышты қа­дам басуына, тек сыртқы ға­на емес, ішкі туризмнің де ілкімді шаруаларға арала­суы­на ықпал етері анық. Со­нымен қатар, ЭКСПО-2017 көр­месіне дайындық пен өт­кі­зу кезеңімен ғана шек­те­л­­мейміз, одан кейін де ат­қарылар жұмыс ауқымы орасан. Сондықтан, бүгінде көр­ме­ден соң территорияны дамыту бойынша тұжырымдама жасалып жатыр», деді Ахметжан Есімов. «Атамекен» ұлттық кә­сіп­керлер палатасының тө­ралқа төрағасы Тимур Құлыбаев өз кезегінде көрме ны­сандары мен дайын­дық жұ­мыстарының жоғары дең­гейін атап өтті. Сондай-ақ, оның бизнеске үлкен мүм­кіндік ашатындығына ерек­ше тоқталды. «ЭКСПО көр­месі өтетін уақытта Астана­­­ға көптеген адам­дар­дың келетіндігі өте маңызды жә­­не елорда бизнесі үшін үлкен мүмкіндік. Қонақ үй, мейрамхана, түрлі ойын-сауық орталықтары, қызмет көрсету саласы, та­ғысын-тағылар қар­қын­­ды дамиды», деді Т.Құлы­баев. Қос тараптың да пікі­рі осыған саяды, яғни құ­жаттың жүзеге асырылуы отан­дық бизнестің дамуы­на айтарлықтай қолдау білдіреді. Асхат РАЙҚҰЛ, «Егемен Қазақстан»