Қазақша сөйлеп, қобыз тартуды армандайды

Мұхиттың арғы жағындағы алып держава тұрғындарының Қазақстанның ұлттық ерекшеліктерін, тарихи, рухани құндылықтарын білуге құштарлығы С.Мұқанов атындағы облыстық әмбебап кітапханада америкалық ақпараттық-мәдени бөлімнің ашылуы кезінде тағы бір байқалды. Оның салтанатты ашылу рәсіміне арнайы келген Америка Құрама Штаттарының Қазақстандағы елшілігінің баспасөз хатшысы Рэн Эльхайдың сөз ауанынан да аңғардық. Бізді бұл мырзаның қазақ тілін үйренуге, қобыз тартуға ден қойған ынта-жігері сүйсіндірді. АҚШ елшілігі солтүстік­қазақстандық жастарды шетел мәдениетімен таныстыру, ағылшынша алған білімдерін одан әрі тереңдету дәстүрін жүйелі жалғастырып келеді. Осыдан он жыл бұрын шетелдік кітаптар мен оқулықтар орталығы бой көтерген болатын. Алайда, қаржы тап­шылығынан уақыт­ша жа­былған еді. Жаң­ғырту жұмыстары шы­ғындарын елшілік өз міндетіне алып, 14 мың доллар инвестиция жұмсады. Бұл қаражатқа кітапхананың бірінші қабатында орналас­қан ғимарат қалпына келтіріліп, кірсе шық­­қысыз етіп бе­зендірілді. Жаңа жиһаздар мен ком­пьютерлер қойылды. Қазір мұнда он мыңға жуық кітап бар. Оның екі мыңдайы – ағылшын тілінде. – Осындай мәдени қарым-қатынастар ар­қылы өзге халықтың тілін үйренуге, салт-дәс­түрлер мен әдет-ғұ­рып­тар туралы мол мағ­лұ­маттар алуға болады. Тіл үйірмелері мен пікірталас клубтары жұмыс істейді. Алдағы уақытта Америкадан оқытушылар арнайы келіп, ағылшын тілін үйретеді. Оқу тегін. Онлайн сабақ өткізу арқылы сөйлеу мәдениетін жетілдіруге де болады. Бізді қазақ­стандық жастардың біл­сем, көрсем, үйренсем деген құш­тарлығы қат­ты қы­зықтырады, – дейді Эльхай мырза. «БЭСТ» гимназия­сының оқушысы Влада Фи­ногееваны осында жо­лық­тырдық. Тұрақты оқыр­ман көрінеді. «Flex» бағдар­ламасы аясында Айова штатында білімін шыңдап келіпті. – Америкалықтардың өмірге көзқарастары мен ұс­та­нымдарында үлгі алар­лық тағылымдар аз емес. Екі жақты се­німді байланысқа не жетсін! Арманым–шет­елде білім алу, – дейді ол. Америкалық ма­мандар аталмыш кі­тапхана қабыр­ғасында жастардың тілдік білімін тексеруге арналған алғаш­қы сайысты ақпан айын­да ұйымдастырғалы отыр. Бұрындары бұл орта­лыққа айына жарты мың­дай оқырман келсе, енді олардың санының арта түсеріне еш күмән жоқ. Өмір ЕСҚАЛИ, «Егемен Қазақстан» Солтүстік Қазақстан облысы