Жанаттың жеңісінен кейін Қазақстан үздік бестікке кірді

Қазақстандық Жанат Жақиянов (27-1, 18 КО) жеңіл салмақта WBA (Super) және IBO тұжырымдары бойынша әлем чемпионы атанғаннан кейін Қазақстан кәсіпқой бокста чемпиондық титулдары бар үздік бес елдің қатарына кірді. Бұл туралы vesti.kz хабарлады. Бірнеше күн бұрын Жақиянов АҚШ-тың Огайо штатындағы Толедо қаласында америкалық Роуши Уорренмен (14-2, 4 КО) жұдырықтасып, төрешілердің шешімімен жеңіске жеткен болатын. Осыдан кейін ол екі бірдей белбеудің иегері атанды. Жанаттың жеңісінің арқасында Қазақстанның да көрсеткіші жақсарды. Енді жерлестеріміздің еншісінде төрт чемпиондық белбеу бар. Оның үшеуі орта салмақта жұдырықтасатын Геннадий Головкинге тиесілі (WBA (Super), WBC және IBF). Сондай-ақ, екуінде де IBO титулдары бар. Бірақ ол аса маңызды болып есептелмейді. Осы көрсеткіш бойынша Қазақстан бесінші орынға Филиппин елімен бірге орналасты. Бұл тізімді АҚШ (12 титул) бастап келеді. Екінші орында – Ұлыбритания (9), үштікті Жапония (8) түйіндеп тұр. Төртінші орынға Мексика (7) тұрақтады. Сонымен қатар, Жанат еліміздің қазіргі чемпион боксшыларының да статистикасын жаңартуына септігін тигізді. Екі чемпионы бар (Головкин мен Жақиянов) Қазақстан алтыншы орынға көтерілді. Мұндай көрсеткішке Ресей, Куба, Тайланд және Украина елдері де ие. Бұл тізімде бірінші орында тағы да АҚШ (12) келеді. Екінші – Ұлыбритания (9), үшінші – Жапония (8), төртінші – Мексика (7), бесінші – Филиппин (4). Айта кетейік, 33 жастағы Жақиянов еліміздің атынан шыққан Василий Жиров, Бейбіт Шүменов және Геннадий Головкиннен кейін төртінші болып чемпион атанып отыр.