Сағынтаев Универсиада жеңімпаздарына уақытылы төлем жүргізуді тапсырды

ҚР Премьер-Министрі Бақытжан Сағынтаев Үкімет отырысында Универсиаданың жоғары деңгейде өткізілгенін атап өтіп, іс-шара ұйымдастырушыларына, сондай-ақ жоғары спорттық нәтижелерге қол жеткізген еліміздің студенттік құрамасына алғысын білдірді, деп жазады primeminister.kz. Б. Сағынтаев Универсиаданың өткізілуі Алматы қаласын дамытуға серпін бергенін, осыған орай алдағы Астанада өтетін халықаралық ЭКСПО көрмесі аясында мұндай ірі іс-шараларды өткізу тәжірибесін пайдалану керектігін атап өтті. «Мәдениет және спорт министрлігіне Универсиада жеңімпаздары мен жүлдегерлеріне, сонымен қатар олардың жаттықтырушыларына уақытылы төлем жүргізуді тапсырамын. Сондай-ақ, Мәдениет және спорт министрілігі Алматы қаласының әкімдігімен бірлесіп спорттық ғимараттарды одан әрі пайдалану мәселесін нақты шешуі тиіс», - деді Б. Сағынтаев. Естеріңізге сала кетейік, 2017 жылғы 28-ші Дүниежүзілік қысқы Универсиада 29 қаңтар мен 8 ақпан аралығында Алматы қаласында өтті.