Басты бағдар – сапалы деңгейге көтерілу

«Нұр Отан» партиясының Орталық аппаратында партияның «Қазақстан-2021: Бірлік. Тұрақтылық. Жасампаздық» Сайлауалды бағдарламасының «Цирфлық технологиялар- ды дамыту және мемлекеттік қызметтердің тиімділігін арттыру» тақырыбына арналған «Нұр Отан» партиясы жанындағы «Мемлекеттік қызметтерді көрсету» бағыты бойынша комиссияның кеңейтілген отырысы өтті. Отырыстың мақсаты – «Цифр­лық технологияларды дамыту және мемлекеттік қызметтердің тиімділігін арттыру туралы» Қазақстан Республикасы Заңының атқарылуы жөніндегі орталық және жергілікті мемлекеттік органдар басшыларының ақпаратын тыңдау. Жиынға «Нұр Отан» партиясы Төрағасының бірінші орынбасары Мұхтар Құл-Мұхаммед, Парламент Мәжілісіндегі «Нұр Отан» партиясы фракциясының жетекшісі Гүлмира Исімбаева, осы мәселе бойынша партиялық куратор, Парламент Мәжілісінің депутаты Майра Айсина, Ақпарат және коммуникациялар министрі Дәурен Абаев, сондай-ақ еліміздегі жетекші министрліктер мен ұлттық компаниялардың басшылары мен өкіл­дері, барлық облы­стағы «Нұр Отан» партиясы облыс­тық фи­лиалдары төрағаларының бірін­ші орын­басарлары мен осы сала­ны үй­лес­тіретін барлық облыс әкім­­дерінің орынбасарлары қатысты. Отырысты ашқан Мұхтар Құл-Мұхаммед биыл екі бірдей тарихи оқиға болғанын, оның бірі Ел­басы­ның Үндеуі болса, екіншісі Жол­дауы екенін атап өтті. «Біз Астанада отырып, бақылаған жоқпыз. Өңір­лерге түгел барып шықтық. Депу­тат­тардың бәрі өздеріне бекітіл­ген өңірлерде болды. Мен де бір­қатар облысты араладым. Олардың өкілдері бүгінгі отырысқа қатысып отыр. Елбасының осы екі үлкен тарихи оқиғаға негізделген Жол­дауы мен бүгінгі біздің көтеріп отырған мәселеміз бір-бірімен өте байланысты. Тақырыптың өзі де сол Жолдаудан туындайды. Ол «Цифрлық технологияларды дамыту және мемлекеттік қызмет көрсетудің тиімділігін арттыру» деп аталады. Бұл екеуі бір-бірімен сабақтас дүниелер. Әсіресе, Елбасы өзінің Үндеуінде елімізді саяси жағынан жаңғырту мәселесін алға қоятын болса, Жолдауда экономикалық жа­ғынан жаңғырту, жаңа цифрлық техно­логияға көшу және оны мем­ле­кеттік қызмет көрсетудің бар­лық түріне енгізу мәселесін алға қойған болатын. Мінеки, бұл мәсе­ле тек бір ғана министрлікке қатыс­ты емес, бұл барлық министр­лікке, барлық мемлекеттік орган­ға, барлық облыстағы тиісті мем­ле­кет­тік органдардың облыстық бөлім­шелеріне қатысты», деді партия Төрағасының бірінші орынбасары. Жиын барысында Мұхтар Абрарұлы Президенттің Үндеуде технологиялық жаңғыртуды жеделдете жүргізу, сондай-ақ жаңа сапалық деңгейдегі цифрлық индустрияны дамыту туралы міндет қойғанын жеткізді. «Елбасы өз Жолдауында технологиялық жаң­ғыр­туды жеделдету мен цифр­лық технологияның тұтас индус­трия­сын жасауды тапсырды. Үкі­метке «Цифрлы Қазақ­стан» бағ­дарламасын жасауды міндет­теді. Біздің ендігі мақса­тымыз – осы жоғары технология­ны бүкіл елі­міздің және әрбір қазақ­­стандық­тың игілігіне айналдыру болуы тиіс», деді партия Төрағасының бірінші орынбасары. Ал Дәурен Абаев бүгінде Мемлекет басшысының тапсырмасы шеңберінде еліміздің технологиялық дамуына айрықша назар аударылып отырғанын жеткізді. Сонымен қатар, министр ақпараттандыру арқылы мемлекеттік басқару жүйесі оңтайландырылғанын, қыз­мет­тердің негізгі бөлігі автоматтан­дырылғанын, Қазақстанның барлық ірі қалалары жылдамдығы жоғары интернетпен қамтылғанын, отандық ақпараттық кеңістік цифрлық технологиялар негізінде жаңғыртудан өткенін айтты. Мемлекеттік қызмет көрсету мәселесіне қатысты сөз алған Майра Айсина: «100 нақты қадам» Ұлт жоспары шеңберінде есеп беретін мемлекетті қалыптастыруда 100-қадамды ең халықтық қадам деп айтуға болады. Себебі, мем­лекеттік қызмет көрсетулер азамат­тар тіршілігінің барлық саласын қамтиды. Ал қызметтерді «бір терезе» қағидаты бойынша алуды Үкіметтің азаматтарға арнал­ған мемлекеттік корпорациясы жүзеге асырады. Бүгінде біз Пре­зиденттің мемлекеттік қызметтің бірыңғай провайдерін құру туралы тапсырмасы орындалды деп нақты айта аламыз. Тағы бір маңызды аспект – мемлекет тарапынан көрсетіліп жатқан қызметтер ту­ралы ақпарат тарату. Біз күні кеше ғана өңірлерде халықпен кездестік. Азаматтар мемлекеттік қызметтер көрсету жүйесіндегі жаңалықтар туралы хабардар емес екенін байқадық. Сондықтан, ел тұрғындары мемлекеттік қызмет көрсетулер әрбір қазақстандықтың өмірін жақсарту үшін жасалып отырған игілік екенін білуі керек», деді. Отырыс аясында «Цифрлы Қа­зақстан» жобасын жүзеге асы­руға тек Ақпарат және коммуника­ция­лар министрлігі ғана емес, Үкімет, Үкіметтегі барлық министр­лік пен органдар да жа­уап бере­тіні айтылды. Сондықтан, мемле­кеттік органдардың, ұлттық ком­па­ниялардың және әкімдіктердің өкілдері парламентарийлердің сұрақтарына жауап берді. «Нұр Отан» партиясы Төраға­сының бірінші орынбасары кез­де­суді қорытындылай келіп, тұтастай алғанда, Қазақстанда мемлекеттік қызмет көрсетудің тиімділігі мен сапасын арттыру бойынша көп жұмыс атқарылғанын айтты. Ләйла ЕДІЛҚЫЗЫ, «Егемен Қазақстан»