Менеджмент заңсыздықты азайтады

Оңтүстік Қазақстан облыстық прокуратурасының 2016 жылдың қорытындысы бойынша өткізген алқа мәжілісінде жасалған баяндамаға қарағанда, өткен жылдың екінші жарты жылдығынан бастап прокурорлар күнделікті жұмыспен қатар, өз саласына жобалық менеджментті енгізуді қолға алған. Ал жобалық менеджмент деген не? «Бір сөзбен айтсақ, бұл нәти­жеге бағытталған командалық жұмыс және біздің өңірімізге тән өзекті мәселелерді шешу мақсатындағы өзара байланысқан бірегей іс-шаралар жиынтығы. Қызметкерлерді бір мезетте қайта бағдарлау үшін нақты тапсырма немесе нұсқау беру жеткіліксіз болды. Тек үйретіп оқыту мен жобалық тәсілді енгізудің өзіне 3 айдан астам мерзім кетті. Осы саладағы жұмыс тиімділігінің төмендігіне байланысты орынба­сарларымның арасындағы қыз­меттік міндеттер қайта бөлінді, оның біреуі күнделікті жұмыстан босатылып, жобаларды орындау міндеті жүктелді. Жұмыстың жаңа әдістерін енгізе отырып, біз 12 жобаны жүзеге асыруға кірістік, олардың әрқайсысы біздің өңірге өздігінше өте маңызды», делінді облыс прокуроры Ибраһим Иманов жасаған баяндамада. Осыған орай, бір-екі жобаға арнайы тоқтала кетейік. Халық сенімінен шығудың басты жолы – азаматтардың өтініштерін сапалы қарау мен құқықтарын қорғау. Сол себепті Оңтүстіктің прокурорлары Бас прокуратура секілді «Тиімді шағымдар қоғамы» атты жобасын іске асыруға кіріскен. Өйткені, шағымдану, арыздану – Оңтүстік өңірінде өте өзекті мәселе. Сол шағымдардың саны жылына 10 пайызға өсіп отырады, бірақ, өкі­нішке қарай, олардың 18 пайыз­ы­на ғана жауап беріледі екен. Аталған жоба аясында «Қо­ғам­дық қабылдау» институты құрылған. Жеке қабылдаулар тек Консультативтік кеңес мүше­лерінің қатысуымен өткізіледі. Бұл кеңестің құрамына облыстың абыройлы азаматтары мен прокуратура ардагерлері енген. Нәтижесінде осындай тәжірибелі азаматтардың қабылдауында болып, кеңес алған азаматтар қайта шағымданудан бас тартып, жеке қабылдауға жазы­лушылардың саны 2 есеге азайған. Жоба іске асырылған 4 айдың өзінде прокуратураға түскен өтініштердің саны 30 пайызға төмендепті. Облыстық прокуратура қолға алған тағы бір мәселе – жер телімі төңі­регіндегі заңсыздықтарға жол бермеуге қатысты. «Жер учаскелеріне өз бетінше иелік етуді жою» жобасы аясында жер учаскелеріне өз бетінше иелік етудің 452 фактісі анықталған. Қолданылған шаралар негізінде кейбір жерлерді қала әкімдігі заңдастырды, кейбіріне уақытша пайдалану құқығы берілді. Қал­ғандары өз бетінше жерді босатқан. Қолға алынған шаралар барысында облыстық кадастр ор­талығында жер учаскелерінің орналасуы мен координаттарының заңсыз өзгертілгені, кадастрлық істерге оңды-солды жалған мәлі­меттердің енгізілгені анықталған. База кімнің болса, соның қолында жүрген. Содан прокуратураның жүргізген жұмыстарының нәти­жесінде жерге орналастыру қыз­метімен айналысатын 79 жеке мекемелермен келісімшарттар бұзылса, кадастр мәліметтерін заңсыз қолданудың жолы кесіліп, базаны ашық қолдануға мүмкіндік жойылған. Бұл осы саладағы алаяқ­тық деректерін 7 есеге төмен­детуге мүмкіндік берген. Ғалымжан ЕЛШІБАЙ, «Егемен Қазақстан» Оңтүстік Қазақстан облысы