Боксшы Айдос Ербосынұлының келесі қарсыласы белгілі болды

Қазақстандық кәсіпқой боксшы Айдос Ербосынұлының (4-0, 4 KO) келесі қарсыласы анықталды. Бұл туралы vesti.kz хабарлады. Кәсіпқой рингтегі бесінші кездесуін америкалық Майкл Митчелге қарсы 23 наурызда АҚШ-тың Нью-Йорк қаласында өткізеді. Жекпе-жек орта салмақ дәрежесінде өтеді. Айдос кәсіби бокста өткізген төрт кездесуін де уақытынан бұрын жеңген. Оның екеуін Украинада, қалған екеуін Алматыда өткізді. Соңғы рет шаршы алаңға өткен жылдың мамыр айында шыққан. 25 жастағы боксшы Жаркент қаласында туған. Алматы қаласына көшіп келгеннен кейін бокспен 11 жасынан бастап айналысқан. Әуесқой бокста – Қазақстан чемпионатының жүлдегері. Сонымен қатар, «Astana Arlans» сапында шаршы алаңға шыққан. Айта кетейік, Нью-Йоркте тағы бір отандасымыз WBA (Super), IBO, WBC және IBF белбеулерінің иегері Геннадий Головкин (36-0, 33 КО)  18 наурыз күні Madison Square Garden аренасында америкалық Дэниэл Джейкобспен (32-1, 29 КО) жұдырықтасады.