Головкиннің 19 жасындағы видеосы жарияланды

Әлеуметтік желілерде кәсіпқой боксшы Геннадий Головкиннің жас күніндегі видеосы жарияланды. Видео 2001 жылы маусым айында боксшының 19 жасында түсірілген. Бұл оның әуесқой бокста қазақстандық жаттықтырушы Ғалым Кенжебаевпен дайындалып жүрген кезі. Vesti.kz мәліметі бойынша GGG әуесқой рингте сегізінші жыл жаттығып жүрген шақ. 2000 жылы жастар арасында жартылай орта салмақта әлем чемпионы атанса, 2001 жылы Шығысазиялық ойындарында топ жарған. Ақтық сында қазіргі кәсіпқой боксшы Дэниэл Гилді жеңген болатын. Бұл видео түсірілгеннен кейін бес жылдан соң Головкин кәсіпқой боксқа ауысты. Бүгінде орта салмақта WBA (Super), IBO, WBC және IBF белбеулерінің иегері, шаршы алаңда 36 жекпе-жек өткізіп, бәрін де жеңіспен (33 нокаут) аяқтаған. Келесі айқасын 18 наурыз күні АҚШ-тың Нью-Йорк қаласындағы Madison Square Garden аренасында америкалық Дэнниэл Джейкобсқа қарсы өткізеді.